نحنا والعمر/ روميو عويس

عندما كنت في المستشفى كان في الغرفة معي رجل مسن يعاني من المرض وفقدان الذاكرة .
ـ1ـ
كلمن بتَخْتو وبينّا في ستار
لمَّرضه ع الفَور سَكّرتو
وسامع حكي الحكما وحَكي الزوّار
مع كَهل شَل المَرَض مَقدرتو
عقلو تشَتَّت والجسم منهار
كيف كان بالماضي تْصَوَّرتو
ـ2ـ
ياريت لو انسانّا شي نهار
بيشوف حالو بْغَير تذكرتو
بتذكرة انسان صار ختيار
غَدرو العمر من دون مَشورتو
ضايع ما يعرف اخوتو ولا الجار
وما عرِف لا بناتو ولا اصهرتو
وبسنين عمرو شو مَرَق، شو صار؟
كلّو انمحى عن لَوح ذاكرتو
سألوه وين ساكن؟ شو رقم الدار؟
ما رَدّ، شَهقِت بالبكي مَرتو
ـ3ـ
يا عمرنا واقف صرت عَ شوار
هَبِّة هوا بتكون دَهورتو..
هَبِّة هوا.. وبينتهي المشوار
وبيسَرِّب الواحد عَ مقبرتو..
يا رب نَجّي من عذاب النار
واستر ابن آدم بآخرتو
**