عِدّي الولاد .. وعا وجه الله هربي
خَلّي الاواعي بارضها.. لا تضَبضِبي
وفَلِّت.. ومعها ولادها بين الجموع
وزوجا بِقي.. ما لَقْيِتو يوم الرجوع
وضَيَّعِت بهروبها.. بنت وصَبي
امّك شو قالت يا طفل هربان
عا إيدها.. من توحشن الانسان؟
كيف كان قَلبا وانت عم بتموت
وعينَيْك عم تصْرَخ انا عطشان
وعضْمَك طَري عا شفافك البسكوت
قاسي.. وممكن بَعدَك بلا سنان
بَعدو حليب الام وَحدو القوت
ونَشَّف حليب الام عا الحرمان
عا الهَلَع.. عا قلبها الممقوت
عا الخَوف من لحْيِة وحِش كلبان
سقّاح عم يدْبَح.. يهِدّ بيوت
ما بيرحَم الاطفال والنسوان
والعَدل؟ ايّا عدل؟ بالتابوت
عَفَّن.. وطلعِت ريحتو من زْمان
سائل سأل.. وين نَخْوِة العربان
مش شايفين الظلم والطغيان؟
رِدّ.. ليش صاير بنص لسان
جاوب: تا ما يقول العرب عميان
قال: كل الحق عا الطليان
نشْفِت دموعي .. رْميت محرمتي
رجعِت الموصِل .. لاحِت الضحكي
لو كان عا ترابا حَجَر تَخْتي
بنام بْهَنا.. ومن فَرحتي ببكي
مهما الرياح تجن .. وتزيد الحروب
ولو تآمرو عا خرابها كل الشعوب
بغداد.. مش رح ينطفي مشعالها
والشمس بدا تطل لو طال الغروب
تاريخها فَخْر ومجد اجيالها
والنصر جايي.. زَيّنو كل الدروب
يحقق لاهل الوفا آمالها..
ونرفع الرايه للعلى.. وتهنا الفلوب
ليست هناك تعليقات:
إرسال تعليق