سافر يا قلبي وعش حياتك في الخيال
سافر وميهمّكش أسوار المحال
نورك ف. حلمك مهما قالو مستحيل
يكفيك بإنك عشت عاشق للجمال
==
سافر يا قلبي للنجوم وابعد كمان
عد السما واطو مسافات الزمان
سافر بروحك روح بعيد هتشوف عجاب
روحك سفينتك بيها هتعدي الطوفان
==
سافر يا قلبي واكسر الأغلال أكيد
تقدر تحطم كل قيد كان فيه وعيد
لما تحس بظلم مش قادر عليه
يبقى مفيش غير باب إله قادر مجيد
==
سافر وقل يا رب هتهد الصعاب
سافر ولا يهمّكش أسراب السراب
بكره الأمل هيعود كما نور الصباح
بكره الأمان نرويه بأنهارٍ عذاب
==
سافر ولا تقرا حروف المستحيل
غمض عنيك واحلم وخل الخطوة ميل
لازم تعدي مهما كان حلمك بعيد
كم من نهار صبّح وودّع خلفه ليل
==
سافر يا قلبي واكسر الخوف والسدود
احفر بإسمك مجد يبقى للخلود
خلي اليقين شعلة أمل أدام عنيك
بإيديك هترجع بسمتك من غير حدود
==
سافر وخفف حلم خاد منا الطريق
خل القمر صاحب وخل الليل صديق
مهما الزهور تدبل تصاحب عطرها
واللي بناله بيت هيحتاج فيه رفيق
==
سافر مع النور المسافر في الغروب
واحضن نجوم الليل وخد م. البدر توب
داللي انقضى م. العمر صعب نعوضه
واللي بقالنا قليل ونفرحبه يدوب
– مصر
m_mohamed_genedy@yahoo.com
ليست هناك تعليقات:
إرسال تعليق