للمفكرين حالن شعرا/ روميو عويس

الشعر ؟ فَن وموهبه واقمار

تلمع صُوَر،والوحي ؟ من الله

الاوزان ما بتكفي ومانها عيار

ضروري بنَفَس ابداع تتحـلّى

الشعر خَلْق وفلسفة افكار

مانّو شَقع ابـْيـات حايللا ..

الشعر خمره والقصيد جرار

واللي الخوابي بالخمر مَلّا

ومش قدّها،يترك لغيرو الكار

ويترك خوابي الخمر بمحلّا

جَودة الخمر بتكشف الخمّار

يا أرفـع شهـادة بـيـوصَلّا !..

يا الشارب بيعطيه لقب حمار

و عا الخمر لا بَقّى ولا خَلّى

وكتـار سَـمّو حالهـُن شـعّـار

وطبعو دواوين وكَتَّرو اسمالله

والمدّعي؟ما بيستحي بيغار

من الشعرا .. لشعرْهُن صَلّا

وبيسأل شو رأيك فيه؟وبتحتار

بين الصراحـه .. وزور متْجَلّى

ان كنـت صادق؟جَنّ يا ستّار..

وان كذَّبـت حـالك تا تتسلّى

وترضيه؟بتلاقي الافندي صار

يمْـدَح بشعرو .. ينتقد لكْـبار

وابـداعُن .. وقصـدانـهُـن كلّا

مصيبه .. لنْصابو بالغرور كتار

القصدانهُـن مش صالحه إلّا

للرمي متل الحَطَـب بالنّار ..

لهيكي نفوس مْـعَتَّره بقلّا :

زغـار انـتو .. ورح تْضَلّو زغـار

انتو هواة .. وبَـعْدكُن قصّـار ..

الشاعر الموهوب ؟ يا شطّار

مشروع شاعر .. من صنع الله

 سيدني استراليا