قصيدة الرثاء التي القيتها في حفل تأبين الشاعر جوزيف الهاشم " زغلول الدامور " الذي دعت اليه رئيسة جمعية انماء الشعر الدكتورة بهية ابو حمد مساء الاحد 11 شباط 2018
بذكر ولمّا عالدني فقنا
نغمة قوافيك تسرقنا
صوتك شدى يطلع من المزياع
بقصدان.. شو فيها تعلَّلقنا
كبرنا عا سحر الصوت والابداع
وزغلولنا البيغَرِّد عشقنا.
وتتنَقَّل الجوقة بمدُن وضياع
ياما خطى حفلاتها لحقنا
وعا شعر يكرُج والوزن انواع
شو اسمك تمَجَّد يا خالقنا.
بْرَمْت الدني وكل الدني ما تساع
زغلولنا ال رافع بيارقنا.
لبنان قالو!.. موطن الابداع
جَنّة عَدَن خلقِت بمشرقنا
بجنّة عدن؟ صار الشرف منباع
ول كان خَلْف؟.. كتير سابقنا!..
الناطور سارق.. والاراضي مْشاع
وعا صْدور اخوتنا بنادقنا !..
الازعَر مْكَرَّم .. والمثَقَّف جاع
وداق الفقر.. هيدا اللي حارقنا.
زغلول؟ بالاوطان حَقَّك ضاع
وشو قَصَّرو بحقك .. ما صدَّقنا
لكن بهية بذوقها اللماع
تا تكرّمَك .. حدّا تحلَّقنا.
زغلول يا مسافر بدون وداع
سَبْقَك " ابو روكز ".. ما فارقنا
عا طول باقي اسمكُن ينزاع
بفَضلكُن.. بالشعر حلَّقنا
الله يْعَوِّض عالزجل بقلاع
وزغلول متلك.. بعد يرزقنا.
ليست هناك تعليقات:
إرسال تعليق