يا اجمل الاوطان يا غالي
يا حلم ما بيروح من بالي
يا جرح عم يوسَع بـ هالغربه
تا يهَد كل صروح آمالي
كنت احلم عـود عا روابيك
وكمِّل شو باقي من حياتي فيك
صرت يا لبنان عم ابكيك
وابكي على أهلي وعلى حالي
كتير من حَـقّـو شعـب غضبان
يرفَع الصَرخه ويلعن الحرمان
لكن عا جَيشو يوجِّه الحجران
هَيدي خيانه وجرم ونْداله
جيش الوطن سهران تا يحميك
متلك ما عندو أكل.. تا يطَعميك
بيت الزَّعيم البالرخص شاريك
بدّو رَمي بحجار وزباله
يا رب لا تسامح ولا انسان
دَق مسمار بنعـش لبنان
وكل اللي زَرعو بموطني الاحزان
وكل اللي وَصَّلنا لهالحاله
**
ليست هناك تعليقات:
إرسال تعليق