زعلت وقلتله زعلان ولا همه
وقلت اسأل على صحبك وإيه همه
وعمر الندل ما يسأل ولا يهمه
عشان مصلحته هيبيعك وينسى امه
==
قالولي الخير على قدوم الجدع دوه
فتحت الباب وخدته ف. حضني من جوه
وكان عينه على جيبي بدون قوه
سرق محفظتي من غير ما دري مين هوه
==
شبعت كلام كلام ف.كلام مشبعني
وقاللي وعود ولا وعد اقترب مني
سألت حكيم وقاللي الصدق يا أبني
بفعلي معاك وغير الفعل كدبني
==
جري والناس بتجري وراه وشنكلته
وكان ف. إيدية دهب وفلوس وحلفته
أقعد يقسم لي دا مالي ودهب أمي
وجاتني الناس قالولي يا ريت ما صدقته
==
إذا كان الجدع منا كتير يحلف
برب الكون وبالإنجيل وبالمصحف
تأكد إنه كداب وانت مش داري
ولكن يوم شروق الحق راح نعرف
==
يا ريت يا صاحبي يا ناسي تفكرني
أنا إمته نسيتك يوم لتنساني
أنا قلب انجرح ياما ومنيش نادم
أسامح لجل عين المولى ترعاني
==
يا طير يا ساكن الأشجار تلاغيني
أجيلك فوق وكان والله من عيني
تسبح ربنا مولاك ويشجيني
سماع صوتك وحمد الله مكفيني
==
يا ساكن القاع ومين يدرى بأحوالك
تعوم تسبح ورزقك مش على بالك
تسبح ربنا مولاك وتسبيحك
صدى الأكوان لرب العرش سبحانك
==
تشوف النمل تتحسر على الإنسان
طرق وبيوت نظام محكوم بكل أمان
وجيش حامي حدود أرضه وسعيه جميل
وانا والناس ما بين نايم وبين نعسان
==
آمنت وقلت أنا ربي آله واحد
ورزقك م.السما جالك من الواحد
ولو رايد تكون آمن ومتهني
لا تتجنى ولا تظلم ف. يوم واحد
==
بشوف ف. الدنيا ناس بتبيعها مجاني
وغيرها كتير بتعبدها وبتعاني
غريب يا عابد الدنيا ولا مره
تقول يا رب سامحني وانا الجاني
==
كتير بيموت ومين يتعلم العبره
نقاتل بعض والكاس باقي فيه شربه
بدال ما تجيني تحملي معاك ورده
تزورني بس نار ف.عنيك وميت حربه
==
قالولي الحال مهش هوه وغلا فاحش
وناس مش طايقه بعضيها بتتهاوش
مدام مش متقي ربك مسيرك يوم
تدوق الموت وإسمك ف. الحياه عايش
==
إذا عايز تشوف الحق من غير جور
وعايز تعرف الساحر من المسحور
ومين ظالم ومين اللي اتقتل مظلوم
تقول يا رب بصرني بنور على نور
==
أنا وحدي بعيش الليل بأشعاري
وبيت يحضر وبيت يعصيني لنهاري
لنلت ابيض ولا أسود ويكفيني
أهادي الناس شعوري ولحن أفكاري
==
- مصر
m_mohamed_genedy@yahoo.com
ليست هناك تعليقات:
إرسال تعليق