ـ1ـ
يا فكر دَخْلَك ردّني لهونيك !..
لمطرح ما قلبي معمشق زْماني
عا ضياع فَجرا كان صَيْحِة ديك
عا بيوت رَغم الفقر عمراني
عا بواب مفتوحه.. على شبابيك
مروق الهوا بدرفاتها غناني..
لإم تدعي: " ربّنا يحميك"
وعيله بعيون البي منصاني
ـ2ـ
لعهد الصند والنير والمعدور
والساقية والنبع والكرمات
والموقده والجرن والتنور
وتسولف النسوان والعجقات
وصوت المكاري وصيحة الناطور
ولَـكْن الغسيل وشقعة الحطبات
وقدرة الفخّار و "البابور"
لخصّ الحرير وخيمة الطرشات
لعرزال حيطانو قصب باتور
تلفح خدودو الطف النسمات
لصيد الحجل بالجرد.. للعصفور
ليعْلَق بشجرة تين عالدبقات
للمدرسه لللَوْح والطبشور
لسهرات يمضى ليلها حكايات
ـ3ـ
ياعمر راكض والامل مكسور
هيهات نرجع عالوطن هيهات
الرَّجعه وَجَع قلب ودمع محرور
لا اهل لا اخوه ولا خيّات
الكل بَيْتُن صار عَتم قبور
ورفاق نصُّن غاب نصُّن مات
صار الربيع بلا دَفا ولا زهور
ورَفّ الصبايا طَلَّق الطرقات
وصار الحَيا قلِّة حَيا وفجور
غاب الحلا وتغيّرو العادات
وبالبال بعدك يا وطن محفور
لآخر العمر.. وآخر الزيتات
ليست هناك تعليقات:
إرسال تعليق