الظابط : خير يا سيادة الأمين
الأمين: لا مفيش حاجة بس الكفرة دول زعلونى
الظابط: نهارهم اسود تحب نعمل فيهم ايه
الأمين: لا ما تتعبش نفسك أنا ضربتهم بالنار
الظابط: ولا تزعل نفسك هما اتصابوا تحب نجيب لهم الاسعاف
الأمين:. لا ماتوا
الظابط :خلاص مفيش مشكلة
الأمين: يعنى كله تمام
الظابط.: تمام يا سعادة الأمين ولا يكون عندك فكرة ...فى جزمتك ..دول أقباط وانتا فى المنيا والدفاتر دفاترنا ودول كفرة ملهومش ديه
الأمين:. يعنى نعمل ايه
الظابط: نعمل محضر ضدهم
الأمين :نقول ايه
الظابط: ايه يا سيادة الأمين انا حا افهمك شغلك ..اقطع زرار الجاكيتة الميرى وخربش وشك خربوشة صغيرة وتروح تجيب تقرير طبى من مستوصف الجامع اللى قدام الكنيسة يكتبوا فيه انك عندك كدمات وكسور وتتهم القتلى بأنهم عملوا كده وبعدين خطفوا السلاح الميرى وجم يقتلوك اتحركت ف الرصاصة طلعت من الرشاش بتاعك وخبط فى الحيطة ورجع دخل فى صدر الراجل ولأنه قلبه اسود فالرصاصة ارتدت وخرجت من صدره دخلت فى صدر ابنه
الأمين: ايوه بس ده فيه اكتر من رصاصة
الظابط :وايه يعنى هو مش بتوع الطب الشرعى اثبتوا إن فيه واحد انتحر ب أطلاق عشر رصاصات على دماغه علشان ينتحر
الأمين: عندك حق سعادتك
الظابط:. انت راجلنا ولازم نعمل معاك الواجب
الأمين:. تشكرا يا باشا
الظابط: لا شكر على واجب يا سيادة الأمين وما تنساش ترفع على الورثة قضية تعويض على زرار البدلة الميرى
الأمين: تمام يا افندم
ليست هناك تعليقات:
إرسال تعليق