مبارحه النجار قال: كعـيت
ما عدت لَحِّق اعمل توابيت
ببلاد صار الموت سيرتها
شَعبا غَفا وحكامها عكاريت
بيروت صار الليل حلّتها
وصارت مدينة رعب كيفما مشيت
ملَوّته بتشرب مويتها
ورجعت لعهد الكاز والكبريت
بلادي شعوب الارض حسدتها
مناخا الحلو بالكون ضارب صيت
بحكامها من زمان بلوتها
عملو السياسه لعبة عفاريت
بلادي جبين البدر طَلّتها
فيها حلا ايّام عمري ربيت
الله يساعِـد عا مصيبتها
عا وضعها من كل قلبي بكيت
مهما الظروف تزيد قسوتها
لا حَـلاها ولا غَـلاها نسيت
بلادي نواطير الكَـرم عـلّّتها
كلُّن لصوص وكلُّن عكاريت
**
ليست هناك تعليقات:
إرسال تعليق