بدكن تَ خَبّركُن اذا بحبا ؟ ..
بدكن ما اترك ستر عا مْخَبّا ؟
بحبا كتير.. وتقبر عضامي
حُبّا رجايي وكل احلامي ..
رح جن من حبا .. دخيل رَبّا
رح اوصفا وما اذكر اسامي
وعَدتا عا ذكر الاسم اتأبّا
وما بخون وعدي بكل ايّامي
خَلّي عا اسما الناس تتنَبّا
بيغار منها الزنبق النامي
وعطر البنفسج مَسكَنو عبّا
انفاسها من عطر لخزامي
ريقا عَسَل وشفافها مْرَبّا
شعرا بنعومة ريشة نعامي
خَدّا ورد ، جسما متل قلبا
ابيض نَقي يا طهر لحمامي
كل الجمال بقلبها مْعَبّا ..
عندا عا خَدّا اجمل عْلامي
ماسه دخيل لْحَطّها وصَبّا
وصرت حب التوت والشّامي
كرمال ها الشامه العلى جنبا
حبا .. منَوَّر كل ايّامي
من ساعة لقلبا الندا لَبّى
بحب طَيْفا ان مَر قدّامي
وبعبد تراب الارض عا دَرْبا
لا تسألو اكتر اذا بحبّا ..
--------------
الحب بالانسان مدري جنون
قالو بيمرق بالعمر سَكْره
قلت بكرا بتخلص وبتهون
وخَلَّص العمر وما اجا بكرا
ليست هناك تعليقات:
إرسال تعليق