حبل كبريت
يا شربل بعيني الشرح جايي
إلو شهرين ضايع مستوايي
عليه برمت لما قطعت سيره
قبل ما إشلح وجودي ورايي
ولأنو مشاكلي صارت كبيره
البدايه شفتها متل النهايه
عجين الملتقى بدو خميره
تا خبز المعرفه يرفخ كفايه
بيقول الحظ عا جهنم مصيري
ما بقدر عا السما ارحل لأنو
حبل كبريت عم يحرق سمايي
**
القيامه
إلك يا شربل بعيني سلامي
نهار الحد وجهتو بمنامي
متلك عا الأرض منعد سايح
بحالي صرت عن زيد اهتمامي
حياتي كلها هموم وقبايح
ومنعني القعد أوقف عا كلامي
ساعه واختها من الكون رايح
ما بدي عا الدني من الموت ارجع
إذا من النوم بتقوم القيامه
**
فراطه
يا شربل بعيني الوفا جابك
تا ناخد فراطه من جيابك
الكلمه ما فينا نقلّها فلّي
ان كان فيها تفصّل تيابك
إنه ما فيك وما التقى علّه
وليل ونهار بينطرق بابك
عنك اذا ما كتبت يا دلّي
بيشارعوني الناس بغيابك
كلمن بيقرا شوي بيقللي
كتابك عن بعيني بصدق مجبول
رح اكتب كتابي على كتابك
**
ليست هناك تعليقات:
إرسال تعليق