اللى ما يشوفش من الغربال/ الدكتور ماهر حبيب

البلد كلها واقفة على رجل وناس عماله تهاتى وتصرخ على حاجة منطقية جدا وناس بتستعبط وعاوزة تمشى شريعة الغاب و نقعد نلف وندور فى الساقية وكأننا شعب لا عنده لا شغله ولا مشغلة والدنيا هايصة مع إن الحل أبسط من البساطة.
يا شعب يا مصرى مشكلتكم فى أنكم تبطلوا الهيصة دى وتطالبوا يحاجة واحدة وبعد كده كل حاجة حا تمشى زى الفل
الإختراع إللى حا أقول لكم عليه العالم كله شغال بيه وعلشان كده دول العالم بتتقدم وإحنا مش بس محلك سر بل إحنا شغالين بنظرية للخلف در وسريعا مارش بس لوراء مش لقدام.
الإختراع ده حا يخلى كل واحد يشوف شغله
كل واحد حا ياخد حقه
كل واحد حا يرتاح وهو شغال وهو فى الشارع وهو بيتفرج على ماتش الكورة
كل واحد يلتزم بيه ويطبق عليه وعلى إبن إللى بارم ديله
ويكون فيه عدل فى الشارع والبيت ومع الجيران وفى النادى وفى الملعب وفى كل حته تلاقيه
الإختراع ده يا سادة يا كرام إسمه القانون
قانون ما فيهوش زينب
ولا فيه أهلى وزمالك
ولا فيه قبطى ومسلم
ولا فيه علمانى وغير علمانى
ولا فيه راجل وست
ولا فيه واحد بيقول لك إنت مش عارف أنا مين ولا إبن مين فى مصر
ولا فيه عسكرى وظابط بيستغل نفوذه
ولا فيه دولة بتحبس واحد علشان قالها لا
ولا فيه دولة بتحشد شرفاء ليها علشان تشتم وتسب
ولا فيها قاضى بيؤمن بأن المتهم بريئ حتى تثبت ديانته
ولا فيها رشوة وتفتيح دماغ
ولا فيها حد بيكسر قانون أو حتى إشارة مرور
بل فيها قانون أعمى العين لكن كله بصيرة لا يعرف الفرق بين أحمد ولا الحاج أحمد
القانون وبس وغير كده إنتوا بتحرتوا البحر وفاكرين إن الحرت حا يطلع لكم كوسة وخيار مع إنكم شايفين بعنيكم إنكم زى دون كى شوت بتحاربوا طواحين هواء وحصادكم مر وأيامكم زى قرن الخروب وإيديكم فاضية ومع إن الحل ده واضح وضوح الشمس لكن مش شايفينه مع إنكم عارفين إن إللى ما بشوفش من الغربال يبقى أعمى لمؤاخذه