1
- يا ريتني ضليت عزّابي !..
ولا كون عايش هَيك بعذابي
وفرحتي لشفتا بيوم العرس
يا ريت ما دقِّت.. على بابي
2
رحلة زواجي كان اصعب دَرس
يا ريتها انحَزفِت من كتابي !..
قالو العرس ما بيمرق بلا قرص
طلعت قراص الكل بحسابي
3
مرتي ع نكد العيش اخدت مَرس
ودَيها ع طول الوقت بجيابي
المتلها ؟ يا ريت خلقو خرس
من لسانها ؟ ما بيسلمو صحابي
وكلامها متل الوجَع بالضرس
وراسا صخر.. وكتير كذّابه
4
هَيك جاري مبارحه قَلّي !..
هوّي الضحيّه وزوجتو العلّه
همّو شكيلي وشرب قهوه وراح
= يا جار مطرح للصلح خَلّي
عندك جرح ؟
غيرك في عندو جْراح !!..
لو سمعت شَكوى الغَير بتْصَلّي
لا تقَضيا هموم وزَعَل ونْواح !!
مصيبتَك ممكن لها حَلّه ..
قارنا مع غيرها بترتاح !..
الرب اشكرو ما بتشعر بقلّه
5
وبعض النسا بتشكي مشاكلها
وبتقول شو عليها.. وشو إلها
بتقول: ما بِدّا من الرجّال ؟
الاّ بعدل الله.. يعاملها
ما ينتظر تا تسألو ع مال
ولا تحسّ منِّه وعَطف مأكلها
بتعرِف بِ انّو النَوم معها حْلال
بدّا بعطف قَلبو يدَللها ..
ويقَدّرا تقدير ام عيال
ويحترمها !.. ما يبهدلها
6
يا ما نسا الرجّال ظالمها
وعَيش الهنا والحب حارمها
مستبد.. وظالم.. وشرّير
بالغطرسه والجهل حاكمها
ومطَلَّقه بيصعب عليها تصير
وكلمن ع كاس وليل يعزمها
ولادا على قلبا غوالي كتير
بدّا مَعُن.. رجّال لاممها !..
والدين عقدِه.. والشَّرَف لكبير
والشرع.. حابسها.. بخاتمها
0 comments:
إرسال تعليق