قصيدتي في حفل زفاف ابني الحبيب داني من ذات الصون والعفاف مرتا كريمة اسعد وليلى الحداد
داني حبيبي .. يا زغير البيت
لزغير غنّوج الاهل .. غالي
انت وطفل شو حركتك حبّيت
تبقى ما تهدا تلعب قبالي
مهضوم تبقى ايش ما سوَّيت
عاجق البيت بحركتك مالي
مرّة ورا لمقاعد تخبَّيت
ورحت غافي بدون ما نبالي
قلنا ضعت.. بذكر انا جنَّيت
وامك تصيح بصوتها العالي
اخبار ولدنتك.. اذا عدَّيت
بدّها نهارات وليالي..
ويبني تا شوفك شب شو صلَّيت
وخاتم زواج بإيدك يلالي
ولما بمرتا العايقه تلاقيت
وعرفت أهلا قَدرهُن عالي
قلت: تسلملي.. عرفت نقَّيت
ريَّحت قلبي .. وريَّحت بالي
وتا شوفكن عرسان شوتمنَّيت
تا تكون فرحتكُن قبل ما غيب
الرَّب حقَّق .. كل آمالي
يبني عملت اللي بيرضيني
بتلبقلك الافراح والزينه..
انت وعروسك جوهرة الماس
وتا تضل راحة بال عاطيني
عامل باخلاص بنت الناس
لا تغضب وتحتَدّ عالهينه
خَلّي العدل بيناتكُن مقياس
بتضَل بين الناس.. رافع راس
الزوجه الرضيّه جوهره تْمينه
ويا اسعد وليلى.. انا ممنون
عرفت.. داني كتير حبَّيتو
وعرفت لما ببيتكُن بيكون
يشعر.. كانّو قاعد ببيتو
انشالله تدوم فراحكُن ويصون
بيت اللي مرتا فيه ربَّيتو
ويبقى زواج مبارك وميمون
والها متل ما تحلمو لقَيتو
وتفرَحو من خَيّها الموزون
والرب يرزق شو تمَنَّيتو
عرسانّا .. انشالله محابسكُن
العم تلمع بصابيع اغلى تنين
الله الحامي الكون يحرسكُن
تعيشو بهنا وحب العمر عمرَين
وبركة الرب ببيتكُن تسكُن
وروح القدس.. يحميكُن من العَين
وجنبكُن يبقى .. يقدّسكُن
وآخر وصيّه يا ضِيا العينين
بدّي تشدّو شوي همّتكُن
قبل ما وَدّع الدنيا وفل
تفرّحو قلبي بشي وَلدَين
الف مبروك والله يهني العروسين وقلوبكم.
ردحذفالف الف مبروك مبدع
ردحذف