قصيدة فؤاد نعمان الخوري الفيروزية، التي ألقاها البارحة في صالون الدكتورة بهية ابو حمد، رفعت مستوى القصيدة من الشعر الى التفنن الشعري، فلقد أدخل كلمات أغنيات السيدة فيروز بطريقة مذهلة، كونها انسابت كينبوع ماء يتدفق من أعالي جبالنا ليصل غربتنا عبر كلمات مموسقة ولا أجمل، وإليكم ما أبدع:
،،،،،
"قدّيش كان في ناس" يا فيروزْ
ضاعُو متل الكنوزْ
ومش عم نلاقيهُنْ!
نعست لياليهُنْ
بردت أساميهُنْ
وبيرجعُو شي نفتكر فيهُنْ!
،،،،،
في بنت تبقى كتير مخجولهْ
بْ جدّولتَين زغار مشغولهْ
والأوله تعلّي
والتانيه تقلي:
"بحبّك، ما بعرف، هنّ قالولي"
وتهرب الجدّولهْ!
،،،،،
"يا ساكن العالي"
يا ساكن ب بالي...
وجايي بَعد مرّهْ
تلبس خطايانا تَ نتعرّى
ونلبس قميص محبّتَك هالهْ...
وتقلّنا: مال الأرض بالي
وانت الدهب يا كنز آمالي
"وغالي الدّهب غالي"!
،،،،،
ومرّات صوتِك بالمنامْ
أبيض متل رفّ الحمامْ
عَ سطَيحة الصيف الحلُو...
وعشّاق عم يتغازلُو
ويتضيّفُو حُب وحلُو؛
ويسكر يقلاّ: يا سلامْ!
وتجاوبُو وتدلّلو:
"وقّف يا أسمر
في الَك عندي كلامْ!
،،،،،
ونحنا شعب هشلانْ
وانتي الوطن والإسم والعنوانْ!
لبنانْ، لهفة مطلعِكْ
لبنان يلّلي بيوجعِكْ
"سالم" عا تلّه بالتلج غفيانْ
"غفيان، مش بردانْ"!
ورح ضلّ صلّيلُو معِك
لآخر قصيده ب جرّة الوجدانْ،
"واسكر باسمَك مجد يا لبنانْ"!
0 comments:
إرسال تعليق