قصيدة شعرية شروقية نظمها الشاعر مروان كساب تقديراً وتنويهاً وابتهاجاً بالمواقف والإنجازات الجديرة بالتقدير والعرفان التي تقوم بها الدكتورة المحامية بهية ابو حمد شرقاً وغرباً لاسيما وإنها رئيسة معهد انماء الشعر العامي والادبي في استراليا وسائر الدول العربية وقد أسدت خدمات وتضحيات وأتمت إنجازات يعجز بوصفها اليراع وتقف حيالها ريشة الخيال صاغرةً خاشعةً في هيكل حفظ الجميل والعرفان
وما هذه القصيدة الشروقية إلا عبارة عن غيض من فيض تجاه تقديري وحفظ الجميل للدكتوره بهية ابو حمد التي قل نظيرها والحق يقال بدون اي تردد
الشروقية
باعت نسيم الارز من أرز تنورين
يوصل عا سدني وفيها تفوح اطيابو
وقرنة السودا الابيي مع جبل صنين
ولبنان كلو بسهولو وهيبة هضابو
تا يشكروكي بأماني يا شمس صغبين
انتي الرفعتي عن المظلوم سرسابو
انتي البهيي البهاكي منور التكوين
انتي الضمير الدرسنا الحق بكتابو
انتي الحنان اللي خلقو الرب حتى يعين
القلب المعذب وعنو يحمل عذابو
انتي اللي قلبك جنينة زنبق وياسمين
والشعر منك نطر تا ينال اعجابو
انتي برأيي لصلاة الشعر تقوا ودين
بمعبد آدابك تراتيل الادب دابو
انتي رسولة محبي لكل المحبين
وبفضل ذوقك حضي المنبر بأربابو
يا ما عطيتي دروعة عز ونياشين
والا بسعيك ما ممكن كان ينجابو
انتي اللي زدتي الادب روعة وحي وتزيين
ومخمل الكلمي لبس من وحيك تيابو
انتي خزينة دراري فايقه التتمين
يرحم الاهل اللي متلن جوهره جابو
الشعار صاروا بفضلك دوم مجتمعين
بقصرك الشرع لأرباب الوحي بوابو
وبفضل نورك علينا بكل لحظه وحين
بدر المواهب رجع يشرق من غيابو
ومروان ذاتو لاجلك شعر ودواوين
الف لمجدك تا مجدك نسمع جوابو
ورتل وغنى وصلا ودوب التلحين
تا اللحن جن وجنونو جنن ربابو
وودا الشروقي وقالوا كتير ممنونين
قوافي الشروقي لمسعاكي ولاتعابو
بيكفي وقفتي بجنب اشخاص مظلومين
وعرفوا شو انتي وجروح قلوبهم طابو
بيكفي حملتي بقلبك قهر المساكين
متل اللي لأجلن حمل عالجلجلي خشابو
وتا يعرفوكي أنا مفروض قلن مين
انتي الوحيدي العطيتي الحق لصحابو
0 comments:
إرسال تعليق