قصيدة قاضي الشعر الدكتور مروان كسّاب التي غنّاها بصوته العذب، في حفل استلامه جائزة شربل بعيني لعام 2023

 قصيدة قاضي الشعر الدكتور مروان كسّاب التي غنّاها بصوته العذب، في حفل استلامه جائزة شربل بعيني لعام 2023، وكأنه يقول للذين بشّروا بموته بخبث زائد: أنا هنا، أنا نسر تنورين، أنا طائر الفينيق الزجلي الذي لا تقوى عليه نيران الحقد، أنا مروان كسّاب.. فاسمعوني.

وللتاريخ أعترف أن عنوان الكتاب الذي اختاره الدكتور كساب لم يكن "شربل بعيني صوت لبنان الأمين" بل "شربل بعيني عبقري الغربة"، فغيرته احتراماً له، لأن عبقرية الدكتور مروان تظهر في كل بيت شعري أهداه للبشرية. أطال الله بعمره.. وألف شكر له على محبته الغامرة. وإليكم ما كتب:

لا بد لي في بداية كلمة الشكر والعرفان من العودة بالذكرى والترحم على مؤسس هذه الجائزة في معهد الأبجدية ـ مدينة جبيل، المرحوم الدكتور عصام حداد، وأخيه الاستاذ المرحوم سامي حداد، الذي تابع لاحقاً تأدية هذه الرسالة التاريخية بمنح هذه الجائزة الحضارية القيّمة بإشراف علم الأدب المهجري، وركنه الوطيد، ومارده الأصمعي الأديب الأكبر والشاعر العبقري المتحلي بالابداعات العالمية الاستاذ شربل بعيني الذي كان لي الشرف الكبير ان أمنح هذه الجائزة القيمة تحت عنوان اسمه العظيم "جائزة شربل بعيني لعام 2023":

أنا ما بين دمعه وابتسامي

حنيني عم بيشرب دمع ظامي

كأني من جديد رجعت إخلق

وشعاع حضوركم بدد ظلامي

وبدي تعذروني بشكل مطلق

إذا ما قدرت عددت الأسامي

لأنو كتر ما فيكم تعلّق

قلبي ما عدت قاشع أمامي

وبقلبي زرعتكم زنبق عا زنبق

وخزامي تاخد وتعطي خزامي

وشعري صب من خمرو المعتّق

تا إلكم إنحني وقدّم سلامي

محامي والمحاكم كنت إسبق

وعن المظلوم إترافع وحامي

وببحر الفضل لما بديت إغرق

وعطيتوني بسخا أعلى علامي

رحت إعمل من الموجات زورق 

تا إرجع ليكم بخير وسلامي

خصوصي داب فيي كل منطق 

والعرفان خرسنلي كلامي

محامي كنت لكن قلت هلّق

لازملي صار أكتر من محامي

ـ2ـ

ويا سدني بحب إنك تعذريني

إذا سافرت وتشرّد حنيني

وجودي من أساسو ظرف قاهر

وكنتي تلملمي دمعي وأنيني

يا سدني عرفت قلبك قلب طاهر

متل امي بحنانك تغمريني

وحنان الأم بدّو يضل ساهر

مهما تخيّم عليها السكيني

مسافر لكن مدشّر جواهر

قصايد دامعه بقلب الخزيني

ولازم طمنك أكتر وجاهر

يا سدني من قبل ما تسأليني

رفيقي بالسفر ربّان ماهر

ودموعي البحر وهمومي السفيني

ـ3ـ

يا شربل قد ما تجور المآسي

ويصير الدهر عا مروان قاسي

ما بنسى فضلك ولا عبء ديْني

بينسيني اللي بلسملي حواسي

البيسأل وينك وتا يشوف ويني

بقلو انت صومعة القداسي

وشوف الفرق ما بينك وبيني

أنا الفوضى وانت عطر السلاسي

بعيني انت والدنيا بعيني

وعاطيني قياس ابعد من قياسي

عاطيني الدر والتاج اللجيني

اللي نسّوني نياشين الدراسي

وشفت الكون عم يزغر بعيني

أنا الكنت بخضم العتم راسي

يعني بجايزة شربل بعيني

صار يدق بالمريخ راسي

ـ4ـ

ورغم إني على مفرق زماني

وعمري بلّش يعد الثواني

لقاكم بسمتو شلال أخضر

محي لون الخريف الزعفراني

وتجلّى عا خيالي طيف أشقر

غزل شال الحرير الارجواني

وبلا كاس الخمر بلشت إسكر

بخمر لطف اللي زرعوني تهاني

شعرت حالي كأني ملكت عبقر

وعياني من الوحي تشتي عياني

تا صار الشعر كلما حرف سطّر

النغم يسكر ويعيد الاسطواني

وصرت من فضلكم عا الضعف اكبر

وخفت فيي الوفا يقلب أناني

رجعت ليْكم وفيكم شفت بيدر

حبوبو مزهزهه وما في زيواني

وجوهر يلمع مقابيل جوهر

بشعر سكران من سحر المعاني

وبعد شرح المحبي صرت مجبر

زيد وقول شو شربل عطاني

عطاني والعطا بهالامر أخبر

عطاني الجايزي الكلا حَصاني

عطاني وأكتر من الخير كتّر

عطاني التضحيي ورمز التفاني

عطاني الجايزي بتكريم نوّر

عليي وحطني بأعلى مكاني

دمعت دمعة فرح منها تأثر

الصخر وصار يبكي من حناني

وبقلبي صرت قول انشالله اقدر

على قد الثقه صون الأماني

وشفت المملكه عا هيك منبر

وفضل شربل اللي توجني بحنانو

هيدا تاج شعري وصولجاني

**