من مستشفى "ويست ميد" في سيدني احيي الاصدقاء الاعزاء بهذه القصيدة التي تبشرهم بانني ما زلت اتنفس الشعر الذي اعتادوه مني، للجميع محبتي ، حفظكم الله من كل مكروه.
مبارحه بسرعه على المشفى
بسيارة الاسعاف نقلوني
خافو بغفلة عَين اتوَفّى
من وجع قلبي و تغمض عيوني
وما دام عطلي بالقلب صفّى
بجْناح مرضى القلب حطّوني
وعجقة اطبّا.. وتا الالم يغفا
مْسَكِّن وَجَع بالمصل عطيوني
بعلمي مْتَلَّج ما كنت ادفى
وباربع حرامات غَطّوني
ممرّضه حلوه صَعْب وصفا
عيونها لبعيد .. اخدوني
حسَّيت قلبي صار بيكَفّا
وتعلّقو بنقلاتها عيوني
وصار بدي للجسم مَطفا
قلّي مْوَدى لوين يا جنوني؟
كل الندوره للهوى موفّى
وطالع مع الفايظ من ديوني
وبعدَك يا قلبي بالهوى مكَفّى
لاخر نفس يمكن تضلَّك هيك
لشم البنفسج عندك ليونه .
0 comments:
إرسال تعليق