قالوا/ روميو عويس

ـ1ـ

قالوا: تا انسى موطني وارتاح

وريِّح من الدَمعات عينيّي!!

قلت الوطن روح وقلب وجْناح

ومن دونهُن عالعيش ما فيّي

ـ2ـ

تركني بَعد في دمعتين زغار

حطُّن عا هالورقه

صارت بلادي بالفكر تذكار

وبالقلب حَرقه!!

ـ3ـ

قالوا: لا تبكي موطنك باقي

ال الله معو ما بتهزمو الايام

قلت الدَّمع من فَيض اشواقي

واللي بيبكي شَوق ما بينلام

ـ4ـ

ببكي عا اهلي عا وطن موجوع

وعا حلم عمري ال طار من دَيّي

عا ناس تَعَّـبها المرض والجوع

هَـمُّن حَـرَق قَـلبي.. وعـينيّي

ـ5ـ

ببكي مع العينيه جرن دموع

بنتو مريضه وداب حنيّه

المشفى مْسَكَّر والدوا مقطوع

من جرم ايدين الحراميّه

**