يسمحلي الاستاذ زياد الرحباني رح إستعير هيدا العنوان مِنو.
الفُسحة هوي مطرح واسع- (بيفيد هالتباعد الاجتماعي يللي عايشينو) - بتشم الهوا فيه وبتتأمل بالطبيعة.
الامل هوي أبعد من كل شي وما إلو حدود.. ومَنَّك بحاجة تكون بمطرح واسع تَيكون الامل موجود، فيك تكون بالحبس او بالبيت او بشي وضع نفسي او اجتماعي ويكون الامل جواتك بوسع الدني.
الامل مش مرتبط بمكان معين، مرتبط بس بشي واحد، مرتبط فيك انت.. ومرتبط بالأسمى ..وكيف بتعيش انت هالعلاقة وهيدا الارتباط.
الحياة ولا مرة بتعطيك الورد من دون شوك، ممكن مرات بتعمل خدمة معك بتشيل الشوك الكبير او كم شوكة، بس بيضل في شوك زغير وهيدا مزعج أكتر...
اذا فكرنا شوي، الشوك عندو دور مهم.. بيحمي الوردة من اشيا كتيرة بتأذيها وهيي يلي بتخليها تكبر وتتفتح وتعطي هالسحر بريحتها وشكلها والجمال من حولها..
من اول ما فتحت عيوني عشت كل الأزمات، طفولتي ومراهقتي وشبابي كانوا بالحرب، دمار .. وريحة الموت مع البارود بعدني لهلق بشما... عدا عن الفقر بهيك وضع...
بس ولا مرة ضيعت "الامل" وكانت "الفسحة" حتى بالملجأ... موجودة.
بعلم الطب وبتخطيط القلب، الزيح الافقي علامة موت والزيح المتعرج طلوع ونزول علامة حياة.
ليش بدنا حياتنا ما يكون فيها طلعات ونزلات بدنا ياها تكون هيك خط واحد.. صحيح إجرينا رح يتعبوا بس النفس رح يكون أقوى وأنظف والأهم... رح نكون عايشين.
مش بالضرورة ولا لازم يكون في حرب وأزمات حتى كون قوية. الحرب ولا أبشع من هيك.. بس بالحرب تعلمت قيمة الحياة، تعلمت شوف كل هبة ونعمة من ربنا، تعلمت انو كل شي زايل ويللي بيبقى هي الابتسامة وعيون كلها حنية.. وحب بذاكرتك عن اشخاص سبقونا عا هاك الدني.
تعلمت انو الامل ولا مرة بخيب اذا كنت بحضور إله عطاك حياته تيكون جواتك كل الحياة.
يللي عم نعيشو كتير صعب. أزمات ما عم تخلص، بتقطعلك نفسك قد ما عم تجي ورا بعضها، بتجرك غصب عنك لليأس ولتكره كل شي حولك ولتغضب وتلوم الكل، إيه مش هين يللي عم نمرق فيه وإذا لازم تنعطى جائزة او اوسكار لـ "survivor" لازم تنعطى للبناني يللي بالرغم من كل شي بعدو عم يتنفس ولو بصعوبة وبعدو بيوعى كل يوم هوي وعم يقول يا ربّ، إيه ... ما خلصت الدني.
كتير مهم نتعلم من الطبيعة كيف بتمشي الحياة..ونتعلم من ضحكة الطفل شو يعني الحياة ...
مش حكي بالغيم ولا فلسفة بس الحياة أبسط من هيك ... وتصديقًا على كلامي تأملوا الأولاد كيف بيعيشوا يومياتهم ... بكل بساطة وعفوية...
العفوية كتير حلوة بتخفف ضغط وزعل ومشاكل ...
وبتحطك على طريق الأمل ...
في أمل؟؟؟؟.. في أمل!!!!!
ليش السؤال وليش الاستغراب ...
إيه.. في أمل ودايمًا موجود ...
لأنو شو ممكن يصير " لولا فسحة الأمل......."
0 comments:
إرسال تعليق