مشتاق/ روميو عويس

وبَحَّه تقلّي: غِل بلحافي

ومتل العوايد ضَل طول الليل

تمرَق علَيكي وتسْكَر شفافي

شو بحترق لما بتجي عالـبال

بسمَـع بادنـي هَمسِـك الـدافي

عالعاشق ليالي الفراق طوال

بيطلع الصبح وبَعد مش غافي

بعدُن بقلبي الذكريات غماق

مهما افترقنا والـزَّمَـن قـافي

ان قالو البُعـد بيدفن الاشواق

بَعدو بقلبي الشوق لا تـخافي

كتيـر فـيـهـا هالـدني اسـرار!!

مهما تقول عرفت.. مش كافي

صعبه بهواكي يكمل المشوار

وصعبه البعد عن شهدك الصافي

لا تخَبّريني بالبعد شو صار

انكَنّو عا قلبِك في حَدا لافي

بَعـدني عـليكي كـتيـر بغـار

وبحبِّك.. ومَحروق سلّافي

**