كلمة وقصيدة الشاعر شربل بعيني باللغة العامية في عرس الادب المهجري الثاني: حفل توقيع كتاب الدكتورة بهية ابو حمد "شربل بعيني منارة الحرف":

مسا الخير.. لأول مره حابب إحكي أكتر من خمس دقايق، يعني ست او سبع دقايق بالكتير، لأني خايف تكون آخر مره بوقف فيها ع منبر بمدينة ملبورن.

حابب إشكركن من كل قلبي ع الكلمات الرائعه اللي زيّنت الاحتفال. كمان ع حضوركن المفرح اللي بيدل ع محبتكن وتشجيعكن للأدب المهجري. فضلكن عليي للأبد. ألله يحميكن.

والشكر الأكبر للدكتورة بهية ابو حمد اللي جمعتنا سوا بهالمسا الحلو. ولكل مين ساهم بنجاح عرس الادب المهجري التاني بمدينة ملبورن.

وبحب قلكن إنّو ملبورن مفضله ع أدبي كتير. هيي اللي عطيتني موسوعة "شربل بعيني بأقلامهم" المؤلفة من عشرة أجزاء، وأكتر من 3500 صفحة، بلّش يجمعها من 50 سنة المرحوم الخالد الاستاذ كلارك بعيني.

ملبورن هديتني أجمل اللوحات الفنيه اللي زينت غلافات أكتر من 40 كتاب من كتبي بريشة الرسامة الفنانة رندى بعيني.

ملبورن ترجمتلي للانكليزية كتابين من كتبي "مناجاة علي" و"فرح ودموع" وهيدا كلو بفضل حبيب القلب الاستاذ ايلي شعنين.

ملبورن زينتني بألقاب خالده: شربل بعيني قمر الكلمه مع جائزة تقدير الكلمة سنة 1986 من قمر الصداقة والمحبة خيي الاستاذ سامي مظلوم.

وشربل بعيني مزهرية الشعر من خيي الاستاذ طوني الحلو.. وإذا بيسمحلي حابب قدم هاللقب للدكتورة بهية ابو حمد.

وسنة 2016 كرّمني نادي شباب لبنان الاسترالي بولاية فيكتوريا بجائزة تقديرية بفتخر فيها كتير.

ملبورن حمّلتني لقب أتقل من جبل، ضليت حاملو أكتر من 45 سنه وأنا خايف إني خيّب ظن خيي الاستاذ الاعلامي المحبوب طوني شربل.

واليوم تعرّفت ع خيي الاستاذ ميلاد اسحق اللي حمّلني لقب شربل بعيني ملك الشعر العامي، ورغم هالمملكه الشعرية اللي هديني ياها.. رح ضل افتخر اني ابن أم وبي فقرا من بلدة مجدليا قضاء زغرتا إسمن سركيس وبترونله بعيني. 

بعتذر من كل قلبي إذا نسيت حدا وما ذكرتو.. لأن ملبورن كانت كريمه عليي كتير.. والأحبه اللي شجعوني فيها كتار، ورح يعيش ذكرن معي للأبد. ألله يرحم اللي ماتوا، وألله يطوّل بعمر كل العم بيكملوا رحلة الادب. 

طلّ الفرح.. لمّن كتابك طل     

يا بهيه.. وبلّش حْسابي

صرت احسب كيف بدري هلّ     

بليلات ملبورن.. أرض أحبابي

هون أهلي.. وعيلتي اللي بجلّ   

وميشال خيي الشرّع بْوابي

من ربوع سيدني بزورها وما بملّ    

وجوه الأحبّه كتير جذّابه

هْديتي الحرف آيات.. مجدا غلّ   

بأجمل صور للعين خلاّبه

إنتي الزرعتي الشعر ورد وفلّ    

ومليون أرزه مزيّنه الغابه

كتابك بـ قلبي صار عندو محل    

لمّن وعي ببيوت أصحابي

صغبين.. قدرت بنتها تحتل    

عرش الادب والتاج عنّابي

تاجك مرصّع بالدهب ع الحل    

وغيرك ع راسو كم شرّابه

اختنقت بلادي.. والزعامه سل   

افتكروا الكراسي بملعبُن طابه

هودي بشر عم يغرقوا بالذل    

باعوا الضمير.. وطوّلوا غْيابي

شُهْدا وطنّا.. الحاربوا المحتل    

وخلّوا البطوله تزيّن عْتابي

بأيّار ستّه.. عيدهُن بيضل    

أبطال أرض ترابها ترابي   

إسمُن علم مرفوع فوق التل     

مش متل زمره كتير نصّابه

يا أرزة الأوطان.. خلّي الظل   

يفيي ع شعبي.. وينتهي عْذابي

ويا شعب لبنان سيفك سل      

بوجّ اللي سرقوا ونفّضوا جْيابي

مش حقّ إنّو تدوق مرّ الخل    

وعصابه تروح وتشرّف عصابه

ختيرت.. بمشي والجسم معتل     

يا ريت بقدر رجّع شْبابي

ضاع العمر.. ما قدرت وعّي الكل   

وما قدرت إفضح ناس كذّابه

يا بهيه.. الوقت عم بيقل          

بغربة قهر لعبت بأعصابي

 ما همني.. عن هالدني لو فلّ      

البيهمني إبقى "منارة حرف"

تا عيش عمر جديد بكتابي