شرع الله؟/ شوقي مسلماني

د. خطيب بدله معارض سوري قديم للنظام السوري السابق: ".. خلّونا هلّق نتابع الأخبار، صار عنّا، خزاة العين، كميّه ممتازه من الصرع والهبل والكلام الشنّيك،  مرّ معي على الفيديو، عالتيكتوك، شيخ هيئته سلفي وهّابي، على القصر العدلي بحلب، عميقول أنّ هذا القصر العدلي رح يحكم من الآن فصاعداً بشرع الله، بتعرفوا شو عمل هذا الشيخ بجمله قصيره وحده؟، الغى القوانين السوريّة السارية المفعول من سنة 1951 حتى اليوم، غيّر الدستور، قرّر دستور جديد، قوانين جديده لخّصها بعباره، إنّه هذا الشرع الإسلامي، بقى هون أنا بدّي إسأل كمان، هادا تصرّف فردي متل تصرّف زعماء إدلب؟، نحنا نسينا ما نسأله للشيخ، شلون يعني شرع الله؟، يعني قصدك تطبّق الحدود الشرعيّه بهذا القصر العدلي؟، يعني من جلد ورجم وتقطيع إيدين،  أم في عندك نسخه مخفّفه من الشرع؟، لازم الحقيقه نعرف جماعة أحمد الشرع اللي هنّي لردع العدوان وقيادة العمليّات وما بعرف  إيش، أصدروا قرار بعدم التدخّل بلباس النساء في سوريّا، هون الواحد ممكن يسأل إنه هذا القرار صدر لإرضاء أمريكا والغرب وإسرائيل فقط أم هو سياسه دائمه؟، إذا كان سياسه دائمه شو بتفسّر تدخّل المجاهدين في لباس النساء هون وهون وهون وفي القصر العدلي بحمص، أنه ما بيصير إنتو السيّدات تدخلو بدون حجاب وغيره، وأنه ممنوع صداقة الرجال والنسوان في مكان آخر؟، هلّق إنتو كنتوا عم تضحكوا علينا أم هيده تصرّفات فرديّه كمان؟، الشي اللي عم يتم تداوله الآن أنه نحنا الآن أمام مجموعه غير متجانسه من الإسلاميين المسيطرين على مفاصل الدوله السوريّه، مجموعة ردع العدوان اللي بيقودها الشيخ الجولاني أو اللي صار إسمه أحمد الشرع ليست على سويّه واحده من التفّهم والتعقّل، بيتراوح تفكيرهن بين الإعتدال والبراغماتيّه وصولاً بالتدريج إلى حدود الدعشنه، الصديق الصحفي بدر صدقي كتب مقاله زكيّه جدّا بهذا الخصوص، حكى عن هذا التباين عبيده نحّاس رئيس حركة التجديد الوطني المنبثقه أصلاً عن جماعة الإخوان المسلمين في مقابله تلفزيونيّه، أطلق على الجولاني إسم جديد، أنا بظن أنه كلّ الجماعات الإخوانيّه بتتبناه، هو القائد أحمد الشرع، القائد، المهمّ أحمد الشرع عميحاول يلعب سياسه، هادا شي طبيعي لأنه هو يمكن يكون الوحيد اللي فهمان القصّه، بيعرف إنّه اللي صار ما هو ثوره ولا جهاد ولا تحرير ولا إنتصار للأكثريّه السنيّه على الأقليّات أبداً، بيعرف هو وجماعته إنه هنّي إجوا نتيجة الحرب الطويله المستمرّه من 7 أكتوبر لليوم، ونتيجة الإنتصارات الساحقه لمحور أمريكا وإسرائيل على المحور الإيراني، وحتى على روسيا، ولذلك بتلاقي عقله لأحمد الشرع متحرّر من الأوهام وعميحاول يشدّ اللحاف باتّجاه الإعتدال ومسايرة الظروف الداخليّه والخارجيّه البالغة التعقيد والخطوره، ليش؟، لحتى يقدر يستمرّ، وعلى فكره هو عميقدّم تنازلات مو من حقّه يقدّمها أصلاً، على أمل يشيلوا إسمه وإسم تحرير الشام من القائمه، البعض بيقولوا "الآيمه"، زمان كانوا يقولوا مين بتنتخبوا؟، بيقولوا "الآيمه"، بيقصدوا "آيمة" الحزب والجماعه، أمّا الجماعات الجايه مع الشرع فعم تشتغل شغلات أقل ما يُقال فيها أنّها معيبه ومخجله وتندرج كلّها في إطار العدوان على الحريّات الشخصيّه للسوريين، بدهن يفرضوا الحجاب طبعاً رغم القرار اللي طلع إنه الحجاب مانه إجباري، وبدهن يمنعوا الإختلاط وبدهن يضربوا السياحه في سوريا من خلال محاربة اللهو والمسرح، وبمجرّد ما يوقّفوا مواطن على حاجز بتنطلق الأسئله رشّاشاً عن دينه ومذهبه، سنّي؟، درزي؟،  علوي؟، مسيحي؟، شو إنت؟، وتكسير محلاّت بيع الخمور لأبو موزه، وكلّ شوي بتطلع الجماعه الجهاديّه وبتعبّر عن فرحها بتحرير دمشق ـ الشام،  ما بيقولوا دمشق، والناس اللي مصدّقين أكذوبة التحرير". 

Shawkimoselmani1957@gmail.com