استيقظت أزرار الجوري على وشوشات غزال المسك.. قالت إحداهن: أليست تلك وشوشات ذلك الولد الذي لعب بضوء القمر في أزقَّة مدينته في سوق الناصرة وبضوء النّهار مع قناديل الفرح..

 "في وِجْهَك يْسوح النَظَر" ص- 30"

مِثْل النّسيم تْموج 

عَ زْرار الزَّهِر

تْواعِد صَفانا ..

بْجَوْنا يْفيض العِطِر

وعَشِقَ العَتمة في ليل الحالمين بجنَّات ومدن أخرى وخرج منها بنار القصيدة ومناديل الوداع ووهج الحنين وبعض الصّور.. 

قصيدة "ألَم" ص- 13""

"الحَسْرَه على مَدّ المّدى

تِطْوي الهَنا..

تِتْرِكْنا عَ حْدود الألم

يا بين نيران الحِمَم

في ساحِة البُغْض.. العّدَم!!

وصار صديق المُهجَّرين والغرباء والفقراء والعاملين والعاطلين والكادحين لتحصيل لقمة الصّغار وأعشاش عصافير الغائبين ورحيل النّسور وأعشاب البيت القديم الحجر والباحثين عن "راية"...

بالحب ظلّي رَفْرِفي/ يا رايِة في أبهى صور/ عَ الدَّرب علامِة وْعاطِفِه/ بالقلْب غنَّت عَالوَتَر/ مرفوعه مَ انْتي تُخطُفي/ راسِك لحاكم لو أمر...

قصيدة "الرَّاية: ص – 124

وحين تصاعد المشهد الشّعريّ، قالت جوريّة أخرى لزميلاتها الجوريَّات: هيَّا نستمع إلى شاعرنا وهو يُغنّي شوقه لهؤلاء:        

مِشْتاق لَباقات الوَرِد/ تْعَطِّر ديوان الحب/ في بسمِة سَعِد/ مِشْتاق للأعراس..للغِنْوِه/ تْرَجِّع اللمَّات هَالحلوِه/عا ليل نِجْمو كان شو يِضوي/ ما يِلْفَحو موج البَرِد..!! 

قصيدة "شوق" ص- 61.  

قالت الأخرى: هو العاشق.. عاشق براري بلادي.

ردت عليها: هو الشّاعر سيمون عيلوطي.. عاشق براري بلادي.

يركض الآن مع غزال المِسك من مَحَلّ سُكْناه في حيّ الكروم إلى عين العذراء في النّاصرة إلى عين جِكْلة في الرّينة إلى عين أم الشقف في دالية الكرمل وحولها بيوتها بسقوف قرميدها وأعشاش عصافيرها المهددة بالهدم.. يركض الآن مع غزال المسك.. يغتسل بشمس كرملية ويمتزج بلونها الذّهبيّ، بخيوطها.. يتعلق بضفائرها ويسمو فوق الكرمل، "كَرْمل حُبّي..حَنيني/ شوقي.. وجدي وْيا حرام/ صار وَعْدي يِرْتِعِش/ مِثْلَك تمام.

 قصيدة "أخت الكرمل، حيفا: ص - 122. 

قالت غيرها: ما أرق كلماته عندما تُحاكي عالمنا الورديّ:

قَطْر النّدى لَلوردات

جايِب من غُزلان المِسْك

بوسِه أنعم مِ النّسمات

أحزان العَبْسِه بِتْفِك

قصيدة "حِلِم" ص - 28

قالت جارتها جورية: قلبي يخفق مع قفزات غزال المسك وما باح لهُ ولاح "بوسِه أنعم مِ النّسمات/ أحزان العَبْسِه بِتْفِك" وكيف فاح عطره في براري الشّاعر الحامل في كل يدٍ كمشة من تراب بلادنا تقاوم، تناضل من أجل إنسانيَّة فقدتها البشريَّة.

الثّانية جوري: لا تقلقي يا جارتي من يُقاوم من أجل البقاء يُقاوم من أجل الحياة. من أجل الحريَّة والحب والحضارة.. كل قصيدة عند سيمون سنبلة أو وردة أو قذيفة.. أنظري جارتي لجمالي قَطْر النّدى يتوج أوراقي وأغصاني.

... ويمر النّسيم يحمل من وشوشات غزال المسك.. طيب الأرض وصفاء السّماء والرّمز والحنين والسّؤال.. 

كيف شق الصّباح ولمع في عيون العشَّاق وسكب العطر وحين فاح فيض النّور اسلمنا لهُ البر والسّحر والعَلَم. 

1) غزال المِسْك. (ص: 4)

غزال المِسْك يِتْهادى بِسِحْرو

عَ الصّبِح ماشي بْدلال

يِبْهر العشّاق.. يوخِذْهِن لَبرّو

يا لَروضات الجّمال

بْهَالمسا يْهاجِر لَبدرو

يْغازِلو بْفَرْح الوِصال

يِهْدا لمّا يِهْدي عِطرو

يْفيض.. أطيب من الهال.

يْبوح في وَعْدو وْفِ سِرّو

نَعْطي، عَلّمْنا الغزال...

صديقتي الجورية قال النّسيم: "لاعِبيني... وْكيف بِدّكْ إلْعَبي"  أنا النّسيم ومعي غزال المسك (الشّاعر والغزال) عشقي لوطني جعلني في خريف عمري "صبي" هذا الوطن أو الغزال الذي أعاد للشّاعر الحياة والأمل والشّباب التي عادت إلى ملاعب الطّفولة – الغزال الذي يركض بالعمر إلى الأمام – أم يعدو بالشّاعر إلى الوراء إلى قصيدة العشق الصّبا.

2) وَشْوَشاتْ قلب الغزال (ص:111)

لاعِبيني ...

وْكيف بِدّكْ إلْعَبي

خَريف عُمْري صار

بِوْجودِكْ صَبي!!

اشارات:

• الوردة الجوريّة هي وردةٌ جذّابة عطريّة عبقة، تمتاز رائحتها بالعذوبة، توحي بالثّقة بالنّفس، وتزرع الأمل والسكينة، لما لها من دلالاتٍ ترمز للعاطفة والحبّ الصّادق، وما تحمّل النفس من نُبل المشاعر وعمق التأمّل والانسجام.

• عين جِكْلة: تقع في الجهة الجنوبيّة من الرّينة، بجانب شارع النّاصرة- طبريّا وقريبة من مدخل الحيّ الجديد من الرّينة.

• عين أم الشّقف: نبعة ماء طبيعيّة تم ترميمها حديثا منذُ وجود قرية دالية الكرمل وجودها. 

• «وَشْوشات غزال المِسْك» للشّاعر سيمون عيلوطي عن منشورات مكتبة "كل شيء" في حيفا 2017. 

عَتْمِه..!!

ما في حدا مرتاح...

 بْهَالعَجْقه وِالزّحمِه

لا طير هَالصّباح..

وْلا وَطْوَط العتمِه..،

شُبّاكي هَالفوّاح

مستنّي شي نسمِه

تْهَفْهِف على التّفاح..

وَالوَرْد بِشي نًغْمِه..،

هَالحُب وينو راح..؟؟!

قولوا وَلَوْ كلمِه..!! 

******

حُزُن...

الليل والأحلام والحُب العتيق

وسْنين تُمرُق بالعُمُر

 فوق الطّريق،..

ضاعت أماني 

وْفارقت قلبي وُعود

تْحسّر زماني...

وْما صفالي بالهّاوجود

غير الأسى وْخيبات

ما إلها حُدود..،..،

صامِد أنا...

بستنّى بسمِه يا بريق!!

******

بَلْكي...!

نْجوم تهوي بْالهَمسا 

واقْمار تاهَت عَ الدّروب

وَيْلات لَفّعْها الأسى

بِغْيوم أسود مِ الحُروب،..،

موجات تِهْلِك هَالأرِض

غَطّتْنا من طول وْعَرِض

وِنْعيش بين علّ وْعسى...

بَلْكي بْسمانا هَالفرَح

بكره يِجوب!!

******

خيبة أمل

يوم فَلّ الطّير مِ مْواج البرِد

من بْلادنا... 

وِصْفرّت زْرار الوّرِد..،..

والبَدِر غَطّت وِجّو

 كْوام الضّباب،..،

صُرْنا مثِل أشباح 

شَرْدَت بِالمدى

ما عاد حَدّ بْهَالعَتِم

يعرف حَدا...

ضاع الأمل عَ الدّرْب

وِتْلاشى الوَعِد!!  

-------------------------

سيمون عيلوطي- الناصره 

كَمَشْت الليل..
وْهوّ في حالِة نَثِر
مِزْرَق وِجّو
مْفارِقو بَدْر الشّعِر
والريّح تِجلِد بالشّجَر
تُنْشُر دَمار
وِالجّو عاصِف
عَ اليمين وْعَ اليسار
وِبْلاد فوق بْلاد
تِغرق في البَحِر..!
***
هاجَت رُعود
وْماجَت سْدود وْزَحَف
عا لوزْنا سِرْب الجّراد
وْشو قّطّف
أقمارْنا...
وْمُهْجِة تَفاعيل الوّطا (1)
غير السّما وِالشّوك
ما إلْنا غَطا
وِبْحور بِتْنادي الضّحايا
للسّفَر..!!
****
مِنْ دون دَعْساتَك إنِت
فَلّت دُروب
تِسأل عن شْوَيّة
مَحبّه فِ القُلوب،
جاوبْها طير البَرْق
ليش مْلبّكِه؟؟
كل الطّرُق مسدودِه
مَدْري مْشَرْبَكِه؟!!
للخَلْف يجري صار
تيّار النّهِر..!!
****
بْقيت وحدَك تحلم
بْيوم الحصاد
وِتْغنّي "جفرا"(2) وِالرّبِع
كانو بْعاد..
عن عُرسَك اللي يِحْمِلُه
بُكرَه وْيِجي...
عَ بْعيد يِرْهِج
في الليالي المِثْلِجِه
وِطْيور زرقا شارْدِه
بْزَخّ المَطَر..!!
****
عَدّيت ضُلوعَك في العَتِم
كان الضّباب
مْلَفّع حْروف الحَبَق..
وِالوَعْدِ غاب
عا مَدى الكِلْمِه النّدِيّه
شو اخْتفى،..
يَ خْسارِة الوَهْج السّحِر
ليش انطفى؟؟!
حاوَلْت ترسم هالِة
طْلوع القمر!!
****
بِتْحايِل النّجمات تَيْطُلّو بَقا
وِيْغازِلو وَجْنات حِلْم الزّنبقه
من وين جايِب طاقِة
حْدود الصّبِر؟
عِشْق الوَفا
يِغْزِل معانيك بْشِعِر
مِثْل الهَوا...
مِثْل الأريج بْيِنْتـِشِر،..
معقول علينا يْطُل
بكره هَالفَجِر..؟؟!!
------------------
1) الوَطا: الأرض
2) جفرا: أغنية شعبيّة

 (مسيرة العودة في صورة شعريّة)

دَرْب

خلّوها مسيرِه

عَ الهَدَى

مِثِل نَعْفات النّدى

تحكي عن حاضر أليم

ما ينجى مِنّو حدا

تِتْشَعّب فينا الطّرْقات

تْوَدّينا عا متاهات

نمشي في موج العَتْمات

لصوتْنا...

ما في صدىّ!!

حالِتْنا في هَالبلوِه

شِكِل وردِه

عَمْ تِلْوي

لا نجمِه سمانا

تِضْوي

وْلا فِعْل يْكيد العدى!!

بَلْكي بْمسيرْةْ العودِة

عَ الدَرْب

راح نِسْتَهْدي

وْتِطْلع شي نجمِه تهدي

تِكْشِف للقلْب المدى...!

***

حلم...

يوم جَمْعتنا الأماني

عَ الوفا والحُب

وِتْلاقَت قْلوب الحبايب

بالهنا عَ الدّرْب،..

والعَتْمِه فَلّت في أسى

التّنهيد...

توخذ شقانا والوجع

لَبْعيد..!

هَالجّمعه نسّتْنا المصايب

والفراق

حلاوِة الوِحْدِه بْهَوانا

الكُل ذاق

طفّت لهيب الجُرْح...

والأشواق..!

بْهَاليوم ضَوّ النَجْم

عم بكبر

والغيم عم بِيْروح...

بِتْبخّر

صار الوَرِد

يُعْبُق عِطِر أكثر

والكينا صارت مِثِل

قصب سكّر!

هَالطّير رَفْرَف

بالطّرب يِصدح

بْسمانا شُفْتو...

يسرح وْيمرح

فرحان في وحدِة أهِل

صار لِها مطرح..!!

--------------

(من الكتاب الذي سيصدر للشاعر قريبًا، بعنوان: "بنت القسطل- صفورية)

ويل وْرُعْب وْمَحابيس

وِبْلاد بُحْكُمْها إبليس

لا بِيْنام وَلا نام الجّرْم

بِزْرَع شوك، بُحْصُد سَرّيس!!

***

لا بِيْنام وَلا نام الجّرْم

وِنْيـابـو أطفـال تْرُم(1)

يْشَمّر(2) فَخْذ وْيِرْفَع كُم

بِالبَنات بَلّش تِحْسيس

***

يِهْدِم مَيْتَم يِقْلَع وَرْدْ

مَشـانِق مـا إلهـا عَدْ

عّ النّخلِه ما خَلّى بَدْ(3)

إبليس لابِس تِلْبيس!!

***

من شَرّو ما يِنْجى حَدْ

بوم صوتو ما بِنْسَدْ

يِنْعَق بالشّوب وْبِالبَرْدْ

يُبْطش من غير أحاسيس،..

ويل وْرُعْب وْمَحابيس

وِجْهنّم حاكِمْها بْليس!!

1) تْرُم: تأكل

2) شمَر ثوبَه: رفعه

3) بَدْ بالعاميّة: غُصن

بْرجعِة توفيق الفيّاض*

شعّت نَجْمات الإبداع

وشو فَرْفَح وَرْد الرّياض

كِلْماتو صارت تنذاع

***

بعد الغربِة والتّشريد 

وعيشه مليانِه بالهم

قضّاها عن ربعو بْعيد

أهوَن منها طَعْم السّم

شــوقو عَمّــالو بِيْزيد

ممنوع حتى مِ الحِلْم

غير الحَسرة والتّنهيد

بالغربِه هيكي ما لَم

ما لاقى غير التّهديد

ما برجع بَرّ وْلا يَم

بِدّو الحاكِم تِبقى بْعيـد

منفي بالبَرْد وْبِالحَم

إصرارك مش راح يفيد

لا تعيّش نفسك بالوهم

دربك مسدودِه بْحديد..

أخفوها فِ مْواج العَتْم،

شُفتك صامد ما بتحيد

شامخ شو تكبر بالعَزْم!!

***

قُلْت ارْجَعلك يَ بْلادي

أكتب من عِطْر النّوار

شوقي للطّير الشّادي

لَهْلي، لَبْحور الأشعار

للمرجِه،النبعه،الوادي

للناس الْ مِثْل الأقمار

لَقْلامي وْجوّي الهادي

للذّكرى الْ بِقيَت بالدار،

رْجوعَك إشي مش عادي

تَرْكَت لِعْشوش الأطيار

تْغنّي "عَاليادي اليادي"

تِنْعَف قدّامك أزهار...

تْرفرِف حـــولك وِتْنـــادي

أهلاً بِرْجوع الأحرار

* توفيق فيّاض، كاتب فلسطيني، أبعد 41  عامًا عن وطنه  قصرًا، ثم عاد إليه مؤخرًا بعد   إجراءات قانونيّة طويلة.