تسلم يا برّو لْما شفت متلك ذكي

لما عتدت من جور الليالي تشتكي

ويا بهية صاحبة هالمملكة

بتعرفي انو الشعر كلو لك

مين كلفك تحكي شعر من قبلنا

صار الحكي بيناتنا من دون حكي

يا ليلة لفيها الشعر موسم هني

ما بشوف فيها مزايدة ولا مناقصة

فيها الورد غامر زهور السوسنة

وكلمة الحلوة عالمنابرة راقصة

من جهتي توغلت بأمور الدني

وحفلات ما تقشع جناح مقصقصة

ولما بهية بكل حفلة بتعتني

بتطلع الحفلة كاملة مش ناقصة

نحنا بغربتنا علينا مكتسب

منتحمل ظروف الحياة المتعبة

ما شفت لبناني على خيو عتب

الا اذا بيكون خيو موهبة

عالسعي بالحي طالل بالرحب

انسان حامل عا كتافو مكتبة

بتشم ريحة موهبة وريحة أدب

كل ما بييجينا جنح نسمة طيبة

دكتور شيبان احتفل فيك المكان

من محبتك طلّيت لَيْنا وغيرتك

بتحب لبنانك،  ولبنانك كمان

خلّى الأرز عالي جبينو بجيرتك

واليوم نحنا مأكدة ربحنا الرهان

سر الحقيقة بينكشف بسيرتك

سيرة حياتك كلها حب وأمان

ضل خبرنا معاني سيرتك

عا قد يا دكتور عنك ما انحكى

هّلي بيحكي الحق بتعدو وفي

الانسان هالخانو زمانو لو بكى

ما بدنا نقشع يديه مكتّفي

قلت لبناني على حالو ارتكى

من هون سرّ المقدرة والفلسفة

ولبنان كلك معرفة وكلك ذكا

حلنا نحصد ذكاك ونكتفي

الثلاثاء الواقع فيه ٢٩ نيسان ٢٠٢٥ 

ـ1ـ

شربل بعيني جولتو لِمْ جالها

فيها شهادة حق ومروه وثبات

والآلهه بتشهد بفضل الآلهه

وحسن الصفات بيشهد بحسن الصفات

مروان ترغل للدني وغنّالها

وصارت تزقفلو على الاربع جهات

لو تكون حاضي بكل كلمه قالها

كنت طبعت بدل الكتاب معلقات

ـ2ـ

شربل حبيب الشعر ورفيق الأدب

وصاحب قلب متل التلج أبيض نقي

قصايدو لمروان جمّعها وكتب

وجوهري كل اللي كتبو ومنطقي

موهوب كل شاعر خيالي منوهب

بيقدرو وكتفو على كتفو لقي

ويا ناس لِمْ بتضيعو كنز الدهب

لا تفزعوا عند البعيني بيلتقي

ـ3ـ

مروان بدّي تطير ع جناح الأمان

ووين ما غطّيت تحضى بالحنان

يا نسر ساعة ما بتشبق جانحيك

بيكون في منبر ملاقى العنفوان

بلبنان أيّا قلب ما بيبرم عليك

يا شاعر اللي ما خلق متلو الزمان

في ناس مشتاقين يا مروان ليك

طفّي لهيب الشوق برجوعك كمان

ـ4ـ

مروان يا عارف أنا شو بيوجعك

حملت الوجع كلو أكيدي بغبنا

يا شاعر الضليت تعرف مرجعك

مرجعك بالشعر قدرة ربّنا

بدك تدشرنا ما جينا نودعك

جينا نقلّك صورتك ب عبنا

تذكر جورج منصور هالغنا معك 

تذكّر بهيه الوحدها بتحبنا

**

ـ1ـ

شربل بعيني من سنين الماضيين

كان شاعرنا الكبير وخلّنا

لا تسألوني لمين كان عندو حنين

ومحبتو انقسمت علينا كلّنا

شربل بعيني كان شيخ الملهمين

وجبين ناصع شامخ عْلى مطلّنا

وكان المناره بس كنا غافلين

لو ما بهيّه ع المناره تدلّنا

ـ2ـ

يا شربل تذكّر بايام الشباب

كيف كنّا نخمّن الدنيا لنا

وكانت الدنيا مشقلبي وكان في عذاب

وكنا نحب الفقر ما نحب الغنى

ونحيي ليالينا لا شرط ولا حساب

واليوم صرنا نشحد ليالي الهنا

يعني بهيّه الكاتبه عنك كتاب

حسّيت إنّا كاتبه عني أنا

ـ3ـ

لقب المناره شربل بيلبق إلو

ونحنا أخدنا يكون ع الكلمه وكيل

واليوم عن ماضي الزمن لا تسألو

أحباب كنّا وكان ماضينا جميل

شربل إسم ع باب صومعتو ملو

أكتر من اللي برقبتو في بطرشيل

بين القداسه والشعر لا تحلّلو

مش بالقداسه بالشعر شربل أصيل

ـ4ـ

الليله بوجّه هالرساله للعباد

وبشكر بهيّه وجهدها وأتعابها

ولو شهدت فيها ما بخاف الانتقاد

بحيث الخليقه ما عرفت شو صابها

خمسين سنه وإدري الشعر ب هالبلاد

هيي المحبّه الشرعنتلي بوابها

تكريمها للشعر والشعّار زاد

من هيك صرنا ملكها وأحبابها

يا حب عيدك فَرّح الأيام

وانزاحت الغيمات من فوقي

وغير ذكرها وغير ثغرها البسام

ما بيطفي لهفتي وشوقي

حبي لبهيه حطم الارقام

شهدو ع حبي الاخطل وشوقي

ها اللي عا ذوقو حَبْ ما بينلام

شرط اتركوني حِبْ ع ذوقي

سنة حلوه يا بهية الحلوه

الشاعر جورج منصور

**

حبك يا جورج رجح الميزان

بزهره جمعت الزهر والبستان

حبك جميل وما التقا اجمل

الا بهيه شمعة الايمان

دكتورة الفيها الشعر اكمل

دربو وزرعها روعة القصدان

ومن شعر جورج ما التقا افضل

من جهة المضمون والعنوان

خصوصي نسج مخمل على مخمل

ولوحات فيها روعة الالوان

هدية شعر بالقلب تتسجل

بعيد حب العاشق الولهان

هديي لبهيي وقلبها بيقبل

هالهديي الفاقت الاتمان

ومش هم شوقي يشهد واخطل

المهم يشهد قبلهم مروان

الشاعر والمحامي الدكتور مروان كساب

يا ريت انتي وانا طيرين خلقانين

ب عبْ شجره عطاها الليل تحليلي

وغمضْ عيوني قدر ما يمرقو الحلوين

وما شوف غيرِك حدا انتي البتحليلي

بين عمرِك وعمري ان اجو حتى يعدو سنين

برضى بنتفة غلط تا قول من جيلي

عزمت الزنابق تجي تخيطلِك فساتين

وانتي عليكي تهزي الخصر وتميلي

ما كنت بنظمْ شعر وبدَّون عناوين

لو ما حلاكي الشعرْ وحدو بيوحيلي

وما كنت ربْ السما بشكر عا هالتكوين

الكلو جمال وحلا ووحدي بيعنيلي

انتي بهية جمعتي العاطفة واللينْ

ع بواب بيتك انا مرَقَص مواويلي

وتا نضل انتي وانا ع الحب متفقين

ضلي سْمَعيلي شعر بربحلك جميلي

**

    موشح

انتي يا حلوة عَصرك

وحدك بالبال

قلبي صوب هزة خصرك

 دشرني ومال

دخلك ب كاسي صبي

دموع العنقود

لو ما يوديكي ربي

في شي مفقود

     نحنا ما خلقنا نخبي

منعطي ومنجود 

عَلمنا دروس محبه

لكل الاجيال

**

اهدى الشاعر جورج منصور مقطوعة شعرية جميلة الى الدكتورة المحامية بهية ابو حمد بحيث ان هذه المقطوعة بالرغم من اختصارها لكنها تحمل في طياتها نفحات من المودة والحنين واللهفة لاسترجاع زهوة ماضي الشعر الزجلي الجميل

لكن مصدر هذه الرباعية الشعرية هي من تجربة الكورونا التي داهمت الشاعر الموهوب والمحبوب جورج منصور بظروف باتت معروفة من الجميع .

                         ******

الى الست بهية صديقة العمر والملاك الحارس لكل شاعر:

يا بهية للمحبة وللغوى

عطفك لأيام الجميله عادني

وقت اللي كان الحب عالي المستوى

والله تا اشهد للمحبه رادني

ولما الكورونا صوتها بادني دوى

وع دنية الأوجاع شد وقادني

ما فادني رأي الطبيب ولا الدوا

هاتفك لم رنّ وحدو  الفادني

                             الشاعرجورج منصور

                               *****

واشاد الشاعر الدكتور مروان كساب بهذه الابيات رداً على رباعية المنصور:

‎الشاعر المتلك يا جورج شهم وأبي

‎خصوصي بحما متريت احساسو ربي

‎وعا منبرو فارس اصيل بينحسب

‎ولولا كبي برفض انا شوفو كبي

وبدورها شكرت ابو حمد الشاعرين المنصور وكساب على مبادرتهما الكريمة وتمنت لهما العمر المديد.

من عادة كل شاعر أن يتوجّه نحو "الميكرفون" لإلقاء قصيدته، ما عدا الشاعر المتريتي المبدع جورج منصور، "فالميكرفون" هو الذي يركض نحوه.

أجيال وأجيال من المغتربين تنعموا بوقفته، بصوته، بشعره، حتى أصبح أيقونة شعرية في المغترب الأسترالي.

عجنتني السنوات الطويلة وطبختني معه، فكنت أجده كالذهب الخالص، أو كالإلماس النادر.

تواضعه كنز.. وصداقته كنز.. ومحبته كنز.. وما علينا سوى أن نغرف من هذه الكنوز.. وقد غرفنا حتى امتلأت قلوبنا بالمحبة.

في حفل توقيع كتاب الشاعر يوسف جبرين، حمل عصاه وأتى، كي يكرّم صديقه، فأحسست وأنا أنظر إليه أن عصاه قد تحوّلت الى معلمٍ أدبي سوف يحج إليه كل محبي الزجل اللبناني.

قلت له وأنا أودعه: جئت كي أتعلم منك الشعر.. فرماني بابتسامة حب، وأكمل طريقه.

جورج منصور الفارس ما زال يمتطي صهوة الشعر، ويروّض مهرته بعصاه، كي يتنقّل بين قاعة وقاعة، ليشنف آذان محبيه بأروع القصائد.

حماك الله يا صديقي جورج، وأطال الله بعمرك.

أخوك شربل بعيني

 فُجعت بلدة متريت بوفاة الشابة العروس لِيلي شربل عبيد بداء

الكورونا موخرا ً في لبنان وقد رثاها الشاعر الكبير جورج منصور بهذه القصيدة المؤثرة:

وين الملاك ..؟ المَا كرج عَ تمّها

غير بسمة الفيها الورود ترسملو

من كتر ما أشتاقت لغمرة أمّها

أختصرت العمر الكان بعدو بأوّلو

ولبنان هللّي محبّتو بدمّها

ما حَبْ لْعصافير  عنّو. يرحلو

ومتريت غابت شمسها ما همّها

ما همّها غير غَيبة الوجه الحلو

لِيلي يا أحلى وجه في طرحة حرير

انشلحت بحضن الليل شو بنعملّها

لِيلي يا أحلى وجه في جرّة عبير

أنزاح الغطا عنها تَ فضيت كلّها

هَيدا جريح بضيعتِك هَيدا أسير

تخرسن الشادي والحزن محتّلها

لوما القدر اخطر من الديب الخطير

النعجة الوديعه كيف قدر يوصلّها

تَوب الحياة الهانيه هَلْ ونَسَلْ

وبغَيمة السودا التلال مزنّره

ومن صوبنا شي الف مرسال انرسل

تَنشوف بالعرسان شو صار وجرى

ويلّي سألت كرمال الله لا تَسَلْ

ليش الدني ليش الحياة مغيّره

لما إنتهى العرس وخلص شهر العسل

لِيلي عَنْ ترّد الاجر للمقبره

لِيلي يا أم صغيّره افْقَدنا الأمل

بِغَيبة ألام بسنين الماضيه

حملتي المهمه قبل ما الجرح أندمل

وكنتي على عهد الأمومة ماضيه

واليوم عَنبكي ونسأل شو العمل

ما ضَلْ بعدِك غير ليالي الفاضيه

خسارة ألام مصيبة الما بتنحَمَل

وخسارة الامّينْ ضربه قاضيه

أسمك يا ملكي بالقلوب وعَ الشفاف

وعنيسالوني النسر كيف جنحو هَوى

قلتلّهم هَمْ الدني والكون عَاف

تاريخ شعر بكاملو اليوم انطوى

بينك وبين سرارها ما في خِلاف

هَيدي الحياة حْسَبتها شمّة هوا

والموت هالّلي ما كنتْ منّو تخاف

شَنكَلكْ بالليل ورحلتوا سوى

يا عصام من يوم مدري من تنَينْ

حْكينا على الهاتف وصَوتَكْ ما انعرف

حسّيت رجفة صوت مش رجفة يدَينْ

قلبي نَقَذني تَ لحِقْ قلبي طرَفْ

بالكاد انّي فهمت منّك كلمتين

وعتَبت عالملكي العَنْ الخط انحَرَف

وموعود رح يرثيك جورج بدمعتين

وبدّك تذكّرني بميثاق الشرف

برثيك بدموعي بشعري بالحنين

وآخ حمرا نبعها الجرح الغميق

وبرثيك من جرحة صميمي والأنين

وبخلَق شعر منحوت بالملكي يليق

جيبو الليالي تا نحلّفها  يمين

لوما انا ويّاك ما شافت بَريق

كنتْ الصديق اللّي ملي عين السنين

وصعبه الصديق يتنهّد ويرثي الصديق

ومهما البشر عَ شعر ملكي يعّتمو

أصحابك بيتظلّمو اللّي تظلّمك

كنتْ الشعر تعرف سرارو وتفهمو

ومين قدّي يا عصام بيفهمك

وكنتْ كل شاعر حقيقي تكرّمو

والشعر كان يعزّزك ويكرّمك

ومين ما تعدّا عالشعر ما ترحمو

من هَيك عن بنقول الله يرحَمَكْ

يا روميو يا خيرة الأصحاب

ما بحب بكّي الشعر منشانك

كيف الشعر بدّو يصير تراب

هَلْ بَعرفو عايش بوجدانك

مهما بعدت بدنا نضّل قْراب

ونْمرِّق الكلمه عَ ميزانك

يا ملبّس الحلوين أحلى تْياب

قصّيتن من بيوت قصدانك

بالمكتبه في كتاب عزّا كتاب

وتشردقت بالدمع اوزانك

يا ما مسلّا خاطر الغيّاب

واليوم نحنا وشعب لبنانك

تركنا الجروح تقول ضيعانك