قصيدة الشاعر لطيف مخايل في حفل توقيع كتاب الأديبة اللبنانية مَي طبّاع " شربل بعَيني : قصيدة غنّتها القصاءد" وحصولها على جائزة الاديب والشاعر شربل بعَيني

ـ1ـ

نبع المواهب من أرض دوما نَبَعْ

وكل حرّ فيها سْباع بالغابة سَبَع

بتشرق عليها الشمس وبوقت الغياب

من وهجها القرميد بتحسّو انقبَع

مَي فيها من الوحي لبست تْياب

أتبّعت الكلمة متل ما الغير أتبع

بالمطبعة طبّاع ما طبعت كتاب

كتابِك عَ خَد البدر يا مَي انطبَع

ـ2ـ

يا مَي كنوز موهبتك جَمَعتي

وحروف مدّهبة منها صَنَعتي

وحلّقتي بجَو الشاعرية

يا نجمة في سما سدني سطعتي

ولانّك من سليلة  اشبهيّة

يا نَبعة في ارض دوما نَبَعتي

جدِّك كان سيد العبقرية

وانتي خطّة الجد اتبعتي

من دوما من الأرض الأبية

انطلقتي واسمها عالكون زعتي

طريقك مجد وطموح وروية

اشتريتي الجهد والإبداع بعتي

يا مدرسة الابا والاَدمية

لغير الرب ما بعمرك خضعتي

وبعمرك ما وقعتي بالخطية

بغرام الشعر والكلمة وقعتي

يا طبّاع يا خزنة غنية

اسم طبّاع لمّعتي ورفعتي

وانا جايي تقلِّك هالعشية

بسجّل الموهبة أسمِك تسجّل

لمّا كتاب عن شربل طَبَعتي

ـ3ـ

ولمّا شربل قرينا بكتابو

لقَينا الحرف دهّب عَ حسابو

وجدتو خي بالغربة ولقَيتو

فَتَح للضيف قلبو قبل بابو

هداني محبّتو وقلبي هدَيتو

وقبل ما أسألو بعرِف جوابو

وأنا قدّيس للكلمه دعيتو

وبجوّ الموهبه جدّد شبابو

كساني بصدق عاطفتو وكسَيتو

بمحبة قلب ما بينكر صحابو

غيرو دموع عينيي سقَيتو

غدَرني وبالقفا بينعق غْرابو

وهوّي بعَكس غيرو ما نسَيتو

بيشبه نهر ناعم انسيابو

وانا اللّي كَلتْ من ملحو وزَيتو

ما بنكر بيت ضحكتلي عْتابو

ببيتو للزجل أسست بَيتو

وحروف قصايدي ولا يوم غابو

صفّا بيتنا يا ناس بَيتو

غيرو من الشعر ثروات جنّا

وهوّي عالشعر فضّا جيابو

ـ4ـ

وبتوقيع الكتب في كْتار شطّو

وبحر الموهبة ناموا عَشطّو

ما جابوا للقلب حُب ومسرّه

ولا ريق الناس عالاشعار شطّو

ما شالوا من محيط الشعر درّه

ولا قدروا صَوب عمق البحر وطّو

هَيدا علقتو بالشعر مُرّه

وبيقول الناس عَ كرومو تسطّو

وهَيدا ضاع بين بايع وشرّا

ووضع سبع البراري قْبال بطّو

وهَيدا قال عن حالو المعرّى

وتحت شمسيّتو العالم تلطّو

وهَيدا الشعر من أسمو تبرّا

القرود تعّلموا منّو ينطّو

بيبقى جيز عَ يحرتق بجرّه

ولسانو بحق غيرو عن يمطّو

الشعر مُش مسألة نقشة وطرّه

وشعر منقول بجرايد يحطّو

استحوا يا ناس حاجتنا مضرّه

إحترموا الشعر حطّو عَ محطّو

وفي شعّار معنا وناس حرّه

اذا عَ حدود كلمتهم تخطّو

وإذا غطّو على نجوم المجرّه

وغطّو عالشمس والبدر لكن

عَ وهج قصايدي مُش رح يغطّو

الله معك يا شاعر الحلوين     

معقول زغر القبر بيساعك

شعرك قصيدة من عدا تلحين     

لحّنتها عَ لحن أبداعك

سألت شربل" عنّك وتخمين     

من غصّتو قدّرت أوجاعك

مُش بس عن بتوّدعك رشعين     

لبنان كلّو حَسْ بوداعك

محتار بوداعَك شو بدّي قول     

ما قدرت أوفي حقّك بكلمات

ياصاحب البسمه وشعر معسول     

بكتير انعَم من حلا الوردات

معقول هجرك يا رفيقي يطول     

وما نعود نسمع رَوعةالردّات

وشعرك عَ نَول العاطفة مغزول    

 بتحيّكو فساتين  للستّات

بالشعر كنتْ تصول كنتْ تجول 

وجوليات تعشق نغمتك بالذات

وخلفَك مشي بحر الغزل اسطول 

تَ كل حلوة تسمعك بتقول 

    كل ست صارت بالعشق جوليات

**

"شربل" :المقصود الشاعر الأديب شربل بعَيني من أقرب الناس للفقيد الغالي