ـ1ـ
ديوان شِعْرَك شو لنا بْيِعْني؟
مش بس أوزان وحَكي شعّار
شِعْرَك.. لْعُمر بعيد رَجَّعْني
ولمطارِح بعيده.. وحلو المشوار
ومتْلَك ربيع العمر وَدَّعْني..
والشَّوْق دَوَّقني الآسا والنّار
شِعْرَك حٍكيلي شو بيوجَعْني
شعرك ملاحِم.. مَرْكَب وبَحّار
ووَطَن هَجَّرني وما وَدَّعْني
تا يْضَل صالبني على التذكار
عا دموع تحرِقني وما تنْفَعْني
عا حلم ما بيفارِق ولا نْهار!
شِعْرَك؟ خَرير الَميّ سَمَّعْني
وشفت النبع والنهر والدُّوار
وإشيا فراقا كتير لَوَّعْني
نْقَلْتها بشعْرَك صُوَر وخْبار
يا صاحبي.. ديوانَك بيِعْني
مش بَس اوزان وحَكي شعّار
ـ2ـ
مبارح سوى انت وانا كنّا
عم ننشر الكلمه بِمَوطنّا
نلقي قصيده.. نْوَقِّع دواوين
من شِعرْنا المنسي بِمَخزنّا
فيك جَمعتني الصِّدَف تخمين
مرّات خالقنا بيتأَنّى..
وهَيْك بيرَتَّب صِدَف حلوين
فيها منوجِد شو منتْمَنّى
وجدت فيك المَعرِفه والّلين
وخاطرَك متل النحل جَنّى
غبت عن عكّار.. غمر سنين
وضلَّيت فيها.. بحُب تتغَنّى
بضياعها.. اللي اهلها محبِّين
دَمْع الحَنين قصايدَك حنّى
حبَّك لبينو.. محَبّتي لْرَشْعين
بيت القصيد تْنَيْنْهُن عِنّا
قلبي وقَلْبَك بِفَرِد سكّين
نْجَرْحو.. وحنينُن شِعرْهُن غَنّى
وما دام منْصَلّي عا ذات الدين
دين الوَطَن.. بالرّوح ساكنّا
الارز مَعْبَدنا وهوا صنّين
وبْقِيَم مَوطنّا منتْكَنّى؟
شعرك وانتا تاج فَوْق جْبين
الواجب حِمِلني وجيت من سيدني
مبروك.. بالديوان تتهنا
0 comments:
إرسال تعليق