إياك تقوللي انك بقيت أجدع شجاع
وانك عرفت طريق يجيب كل اللي ضاع
طل بعيون قلبك دا لو كان لك شعور
تعرف حقيقة شكوتي من غير خداع
==
أنا عبد ومليش غير الكريم هوه
أنا حكايتي حكاية قلب من جوه
أناجي المولى ساعة ضعفي يا ربي
أجرني يللي من غيرك مليش قوه
==
حلمك يا حلمي بلاش تروح بينا بعيد
حلمك شويه دا حلمي يوم عن يوم يزيد
لما تكون راضي بنصيبك شيء أكيد
راح يرضى قلبك مهما كان حلمك بعيد
==
يللي افتريت على حق ناس مين افترى أدك
عايش قوي لما الضعيف خايف يجيب سيرتك
لو دا السرور قوللي منين تضمن يدوم مجدك
أيام تدور ومسير ف. يوم تصبح ذليل ضعفك
==
أنا من بلاد مصر اللي كانت للبلاد
درة ومنار للدنيا ولكل العباد
معرفش ليه أهلك بقم فقرى قوي
العيب في مين يا خير مأوى وخير زاد!!
==
أنا يا رب محتاجلك أكون وياك
أنا باتمنى من قلبي أعيش برضاك
أنا عبد ومليش غيرك ومطمن
يقيني ف. سجدتي ودمعة بتترجاك
==
يا دنيا مهما تتغابي أن راضي
بتغري كل من حبك بكاس فاضي
وتلهي قلوب على بكره وفين بكره
يروح اليوم وبكره تكوني في الماضي
==
- مصر
0 comments:
إرسال تعليق