1
كتار البها اليومَـيـن سـألوني
بهالانتفاضه موقفك مع مين؟
لا تسـألوني.. قارن عـيونـي
تْنَينُن غوالي.. تنينُن مهمّيـن
2
لبنان حبّي وتـربتـو جـنـونـي
مهما بعدت والعمر عَدّ سنين
زغرتـا وحلبا بمنزلة جـونـه
وطرابـلس وبعلبك وصَـنّـيـن
ومشـغـرة وعَـنـجَـر وبـلّونـه
وصيدا وحاصبيّا وبيت الدين
البترون.. بـكفـيّا.. الـيـمّـونـه
وكل الضِّيَع عندي متل رشعين
3
واللي بأعلا الصوت وَعّـوني
الكل أهلي.. وكلهُـن حـلـويـن
رايـة وَطَـنّـا بـإيـدهُـن قـونـه
انشالله بـيـبـقو هيك متحـديـن
4
وقلقـان قَـلبي.. لا تـلـومـونـي
وخايف!..
يكونو "المايسترو" شـياطيـن
نـفـوسـهُـن احـقـاد مَشـحـونـه
وعندُن نوايا سود.. غشّاشـين
صدورهُـن بـالـشـر مَسكونـه
ووجـوهُهن بالخير مطلـيّـيـن
زعـما.. لغير بلاد مَـرهـونـه
والناس للاضراب مَـدفـوعين
يا ربّ دخلَك خَـيِّب ظـنـونـي
واحمي بلادي وشعبها المسكين
0 comments:
إرسال تعليق