قصيدة الدكتور مروان كسّاب في حفل توقيع الدكتورة بهية ابو حمد لكتابها "شربل بعيني منارة الحرف" بتاريخ 18 اذار 2023:
ـ1ـ
جني يا ربابة ابتكاري
وخدي ألحان من بحة وتاري
وخلي لحنك المجروح عازف
عا ليل الشعر تا يشعشع نهاري
وغني ورندحي من جرح نازف
اللي آخو آخ اشعاري وشعاري
اسأليني والسؤال يكون خاطف
لشو كلفتك تغني بجواري
لأني مقتنع صوتك بيالف
على حنيتي وكرة كناري
ولأني هون بجنينة عواطف
شفت فيها ربيعي واخضراري
ونسيم الذوق نساني العواصف
اللي منها جوانحي تعودت داري
ولأني بعد اكتر صرت شايف
الأدب والفن والشعر الحضاري
بهيي كتابها كنوز ومتاحف
وشربل توجو باكليل غاري
وكأنو مجمع البحرين طايف
وأنا حاير عا شاطي انتظاري
يعني بينهم ما عدت عارف
ايا بحر منو بجيب اكتر
تا عبي جعبتي كنوز ودراري
ـ2ـ
وبتوقيع الكتاب اللي بجداره
الو بالموهبي حق الصداره
كتاب بعطر روح بنفسجيي
حروفو مرصعه بحبر الحضاره
اللي كاتبتو منعرف مين هيي
المحاميي البهاها ما توارا
المحاميي بهيي الالمعيي
لمعصمها العدل قدم سواره
وكتر ما روحها حره وابيي
بوفا ومن دون أيا استشاره
حبت تكتب وتعمل هديي
لشاعر كلمتو تاج الاماره
لشربل للادب للشاعريي
بعيني اللي عمل عالظلم غاره
وبموقع غربتو الغربي السخيي
ملاحم شعر فجرها بغزاره
وحافظ عالاصالي وعالهوية
بأدب زاد الأدب قيمي ونضاره
وصرخ من غربتو الصرخه القويي
نحن إخوان أسلام ونصارى
الوطن قبل الحكي بالجمهوريي
وقبل كرسي النيابي والوزارا
غبن لبنان يتحول ضحيي
وشو بيفيد البكي بعد الخساره
لكن هون عم واجه قضيي
اسمحولي حلها بحكمي ومهاره
بعنوان الكتاب شعرت فيي
خيالات الشعر صاروا حيارى
بهيي وشربل بشوفن سويي
عبير الزنبق وعطر الطهاره
الفرق بين معنويي ومعنويي
العباره ذاتها وذات الاشاره
بشربل شفت مجد الابجديي
وبهيي للحقيقه بشوف فيها
ضمير الحرف وشعاع المنارا
0 comments:
إرسال تعليق