1
علوّاه..عا بـاقِـة "قرصعنّي"
وسليـق "كرّات وحرتنمَنّي"
فراريج مشويّه.. ولحم خاروف
أضعاف.. بعطيكم بَدَل مِنّي
2
ايام كان الفقر احلى ظروف
حلوه الدني ومع فقرنا نْغَنّي
الكشك ترويقه الغدا ملفوف
ورشتا العشا نعمه من الجنّه
3
وشغل إمّي بس كنزة صوف
بفصل الشتي تـرِد البرد عَنّي
الما لحَّقِت ردلّها الـمَـعـروف
العطيِت حَـنانا من عَـدا مـنّـه
4
يا عيشة الضيعه إلك مَلهوف
بهاك البساطه.. عيش متهَنّي
زاد التطور والهنا مَخطـوف
البيفَكِّر بها الكَـون مـتأنّـي!..
كلّنا.. عا هالبسـيطه ضيـوف
نـيّال هـلّي بعيشتـو قـنـعـان
وغير للسما.. نفسو ما بيدَنّي
0 comments:
إرسال تعليق