صورتك بلشت حاكيها
وبمهرجان دموع لاقيها
خايف لا صورة موت او شي منام
جايي لدموع الشعر ينعيها
وبديوا بعروقي ينقزوا الآلام
والذكريات يفيق ماضيها
ومن ميل تاني تكيت الاحلام
وقصايدي اصفرت قوافيها
وما ضل عندي للكلام كلام
تا غيمة السرساب اجليها
وكلما كتبت تتنهد الاقلام
والبكي الكلمات يمحيها
عرفت اللي يبقى خبز للالهام
ومن بيدرو الايام يغنيها
راح وترك عا غيبتو الايام
تدفن معو زهوة لياليها
والأمسيات تحولوا أيتام
من المخمل اللي كان كاسيها
هون عرفت روميو تركنا قوام
وبكيت الصوره وصرت ابكيها
وقلو دخيلك انت يا رسام
صورتو بالقلب خليها
وتنيننا نبكي بدون ختام
تا غرقت الصوره بعينيي
وضليت ابكي تا غرقت فيها
********
روميو قبل الشعر خلقان
ومن قبل جوع الحرف لكتابو
وقبل العشق قلبو خلق عشقان
وداب فيهم قبل ما دابو
شمعة محبي دايب وسهران
يكفكف بشعرو دموع احبابو
وشعرو حنين وعاطفي وحرمان
وجاب شعر الما حدا جابو
وضل رميو ملاك للأوطان
لأجل الوطن عاش على اعصابو
مجند خيالو عا اسم لبنان
وحامل عا كتفو خشبة عذابو
وبالغزل يغزل حلا وألوان
السحر فيها جن اعجابو
للصبيي يخيط الفستان
بزهر الربيع وروح اطيابو
ولا تكون يا روميو حلم قلقان
مار بطرس مشرعلك بوابو
بيكفي شو عندك بالشعر غزلان
يخيط خيالك الهم تيابو
حتى يصلولك سوى بايمان
ويطلبو من الرب وحسابو
عا قد ما الفستان في خيطان
منضل نترحم على ترابو
0 comments:
إرسال تعليق