القصيدة الرائعة التي ألقاها الشاعر فؤاد نعمان الخوري في مهرجان فرقة ارز لبنان "ويبقى لبنان" في الاول من نيسان 2023
،،،،،،،،،،،،،،،،
فرقة أرز لبنان عن لبنانْ
الليلِه عم تصلّي فعل إيمانْ
وتقول: باقي...وكيف رح يبقى
والرّيح هَوجا، والشجر عريانْ!
ومتحكّمِه بأمر الوطن طبقهْ
شياطين أو عميان أو خوتانْ؛
والفنّ عا كعب الدرج حبقهْ
بالعطر عم بتقاوم الطغيانْ!
بالفنّ عم نخلق وطن تاني
بفيروز والمسرح الرحباني،
بفرقة "العاقوري" اللي صرلا سنينْ
دبك ورقص وجْباه عرقانِهْ...
وبعمر ستّه وأربعين تخمينْ
بَعدا الصبيّه شويّ جهلانِهْ!
وبتردّنا عا مجد فخر الدّينْ
وبيصير لون الليل لبناني!
الّله لمّا ها الجسد بيصيرْ
فراشه بمرج الضوّ عم تلعبْ!
وإيدَين ترسم متل العصافيرْ
خيال الشتي والشمس عَ الملعبْ..
وتمرق الغيمه تحملَك وتطيرْ
وتحلم وتتذكّر وما تتعبْ:
يمكن الحلم يكون صعب كتيرْ
بس الحياة بْلا حلم أصعبْ!
لبنان باقي بفضل فنّانينْ
فيهُن الروح المبدع تجلّى،
لبنان باقي بفضل فلاّحينْ
ندرُو التعب، قام القمح صلّى...
لبنان باقي بفضل مغتربينْ
كفُّن عن الأحباب ما تخلّى؛
ولبنان باقي بفضل قديسينْ
عينَيهُن بتحرس وقف الّله!
ايلي العاقوري أنا بهنّيكْ
بفرقه واسم وزنود مشتبكِهْ
وبها الأمل بعدو مشلّش فيكْ
رغم السفر والقهر واللبكِهْ..
خمسين عام تفتّح شبابيكْ
وتقول للزعلان: لا تبكي!
في صبح جايي ورح يصيح الديكْ
وينزل شعب لبنان عَ الدبكِهْ!
،،،،،
0 comments:
إرسال تعليق