ان كَنّو رَبـيـع العـمر بِـيقَدّي
ليش راكض يا عمر ؟ هَدّي
بِالعَدّ صرتو يا سنيني كتار
وما تْغَيَّرو فْصول الهوى عندي
بَعْدا حبال الحب عا الجرّار
ولا تعب قَلبي ولا التوى زندي
الحرمان شدّه .. والخَطيّه؟ زْيار
يا رب لا تترك حدا بْشدّه/ي
جوع الاكل ؟ علّه لها دبّـار
الانسان فيه يصوم عا مدّه/ي
جوع النفس للحب؟يا ستّار..
بتصير جَمْر وشَوْك لمْخَدّه/ي
بيضَيّعَك ، بتهستِر ، بتنهار
وكل الدني بْعينَيْك مْسودّه/ي
الحب ؟ نَشْوه فصولها اسرار
لمّا الحبيبه والعه حَدّي ؟..
ويبدا بخَمْر شفافها المشوار؟
وجـنـونـها آهـاتـهـا يْوَدّي !..
وتنده خَوابيها: سكار .. سكار
ولحن الشَّبَق من نارها الحَدِّه/ي
عـيـونـا، شفـافـا،نـار ، لَـهْـتـا نـار
رَجَّف شَعر جسمي حَرَق خَدّي
ريـقـا خَمر .. وشـفـافهـا خَـمَّـار
ومسموح اسكر متل ما بدّي
هيي وانا .. وجَهْلِة ولاد زْغار
نخلط ما بين المَزْح .. والجَدّي
آدم يا جدّي !.. لَبَّسوك العار
تهموك زور .. وزنْبك مْوَدّه/ي
وقالو عْصِيت وْصيّة الجَـبّـار
عا شجْرة التفاح متْعَدّي ..
بينَك و بَين ستي بْوَقْتـا ال صار
كَرْما حلي .. وتفاحها الوردي
وشفاف تغلي .. وورد نَهْد زرار
وباقة بنفسج تطلق النهده/ي
وتشْهَق متل ملهوف تحت سْتار
ورْقة التين .. ال صارت تْنَدّي
والجُّوع كافر .. والشَّهْد غَرّار
وجوع النفس أصْعَب من المعده/ي
وتصرخ بروحَك شَهْوتَك .. قنطار
هيكي خَطيّه ؟ ولو جزاها النار
مَحْلا الفنا والنار .. يا جدّي .
روميو عويس
0 comments:
إرسال تعليق