كلمتي في حفل العرس الكبير الرائع الذي اقيم في صالة - الدلتون هاوس - الفخمة على شاطىء مدينة سيدني مساء الاحد 4 حزيران الجاري بمناسبة زواج رجل الاعمال الناجح الشاب الجنتلمان نديم حسيب البايع على ذات الصون والعفاف الصيدلانية الشابة ريتا صباغ .
ـ1ـ
يا نديم.. بيوم هـا العرس الهَني
جايي تا هَنّي وقول بِعرسَك قصيد
وانتا عن التعريف بِشَخْصك غني
جمَعْت الحسن والعقل والصيت الحميد
المتلَك عصامي بالجهد حالو بني
بيفيد غَيْرو ومن نشاطو بيستفيد
مبروك يا عرس الورد والسَّوسَني
انت وعروسك تفرَحو العمر المديد
ايامكن حلوة، سعيدة، هَيِّني
ومتل ما الله جَمَع قلب الوَحيد
بقلب ريتا الـ بالعفاف مْزَيَّني
وصارت ضِيا العينين، دمّات الوريد
الرب يرزقكُن هدايا متمني
ومنكن تهَنّو الاهل بتنعشَر حفيد
ـ2ـ
بَيَّك حسيب منعرفو مينو
الاخلاص دينو، والوفا دينو
عاش كل العمر حرّ الطَبع
الّا لربو ما حِني جْبينو
بين كل الرَّبع رَيِّس رَبع
معروف من كافة محبّينو
ان شرِب مَرّة من مْوَيِّة نَبع
ما بينكر الميّات بسنينو
كون حرّ.. ومتل بَيَّك سَبع
بالعمر ما تعَدّى على انسان
وبالعمر ما خَلّى حدا يهينو
ـ3ـ
وامّك سميرة زينة الحلوين
غار البدر من نور طَلّتها
متل امّا.. قلبها مَسـكين
بيشْهِدو سـكّـان ضَـيـعـتها
اعمالها، وأخلاقها واللين
عَطْيِت العيله ومن حلاوتها
لولا ما عمتي منتهى من سنين
يمكن لمار سركيس ندرتها
عا الحلا اللي عندها تخمين
كانت عيون الناس صابتها
الليلة بعرس الارز والياسمين
قَدّ كل الكون فَرحتها
نديم ابنا الـ من ارز لبنان
وياسمين الشام كنّتها
ـ4ـ
وريـتـا اللي عينَيك شافتها
وقلبك رسالة حب وَجَّهلا
وعَطيتَك وَعْدا ومحَبّتها
الورد رَوض خدودها استَحْلى
وزادت حلاوتها.. ثقافتها
اخلاقها كبيرة متل أهلا
متل المسك والتلج سمعتها
التهذيب ثروة والشرف اغلا
والعيلة الـ هالكنز ثَروتها
ولادها بتطلَع على شَكلا
يديم عزتكم يا هـ "الصباغ"
وتسلم ايادي الـ هيك رَبِتها
ـ5ـ
الصيدلاني.. مهنتو يعطي دوا
علاج شافي بَعد تشخيص الطبيب
يا صيدلاني: الرب يعطيكي القِوى
داوي نديم الصار بِ بَيتِك قريب
علاج الزواج الحب، من نَبعو ارتوى
الاخلاق مَبدا والامانة للحبيب
كونو سوى عا المُرّ والحلوة سوا
بتتغلبو عا الشَّر بالظَّرف العصيب
بتبقى سوا ايامكن حب وهوى
وربي ال جَمَع بيناتكن اجمل نَصيب
يْوَفّقكن وما تقشعو ساعة نوى
عليكن تضل عيون خالقنا رقيب
أهلك بهني بسمعتك والمستوى
وبزواجك بالعصامي والاديب
صهر الكَرَم والذوق والهمة حوا
ومباركة الكنّة لسميرة ولحسيب
0 comments:
إرسال تعليق