أوّل نيسان/ فؤاد نعمان الخوري

بتذكّر أوّل كذبِه بْأوّل نيسانْ:
جايي السلْم يزنِّر بالأخضر لبنانْ...
نْطرتُو عَ الباب،
رْسمتُو عَ جرُوح الحيطانْ؛
وْعَدت ولادي:
نرجع ونلمّ الصيف الهربانْ..
وبعدُو بيرجَع وبيكذُب أوّل نيسانْ!
،،،،،،،،،،،،،،،

وياما سْهرنا وحكينا، وكان الديوانْ
مطرّز بقمار الحلم وضحك الصبيانْ؛
ويا ما وعدنا وحلفنا، وطار الحلفانْ
متل مواويل الدغشِه بتمّ الرعيانْ...
قولِك كلّ لْ قلناهُن.. أوّل نيسانْ؟
،،،،،،،،،،،،

...وبيوشوشنِي: النجمِه ما عِندا عنوانْ،
والكلمِه رغوة موج وفقشِت عَ لسانْ؛
بيتَك، أهلَك، تذكرتَك.. وهج الوجدانْ؛
ونيسانَك آخِر ذكرى وأوّل نسيانْ:
هَيْ أوّل مرّه بيصدُق أوّل نيسانْ!